रत्नागिरी : भारतातील सर्वांत छोटे हरीण म्हणून ओळखल्या जाणाऱ्या दुर्मिळ ‘माऊस डियर’ (Indian Chevrotain, Mouse-Deer ) चे चिपळूण शहरात दर्शन झाल्याने वन्यजीवप्रेमी आणि नागरिकांमध्ये उत्सुकता निर्माण झाली आहे.डी.बी.जे. महाविद्यालयाजवळ राहणारे बाळकृष्ण शंकर पालकर यांना त्यांच्या घरामागील कंपाउंडलगतच्या भिंतीजवळ हे दुर्मिळ हरीण लपून बसलेले आढळले. माऊस डियर हा प्रामुख्याने निशाचर प्राणी असल्याने तो रात्री बाहेर पडतो. त्यामुळे त्याचे दर्शन अत्यंत दुर्मिळ मानले जाते.
यापूर्वीही चिपळूणमधील कचरा मैदान परिसरात सकाळच्या वेळी डॉ. विक्रम घाणेकर यांना माऊस डियर दिसल्याची नोंद आहे. चिपळूण परिसरातील जंगल भागात या दुर्मिळ प्राण्याचे अस्तित्व असल्याचे या घटनांमधून पुन्हा अधोरेखित झाले आहे.वन्यजीव अभ्यासकांच्या मते माऊस डियर हा अतिशय भित्रा आणि मानवांपासून दूर राहणारा प्राणी असून त्याचे संरक्षण होणे गरजेचे आहे