मुंबई : दादरच्या अत्यंत वर्दळीच्या प्लाझा (Dadar Plaaza Cinema) सिनेमा परिसरात एका भरधाव 'बेस्ट' बसचे (Best Bus Accident) नियंत्रण सुटल्याने झालेल्या भीषण अपघाताचे सीसीटीव्ही फुटेज आता समोर आले आहे. या काळजाचा ठोका चुकवणाऱ्या दुर्घटनेत एका अज्ञात तरुणाचा दुर्दैवी अंत झाला असून अन्य तिघे जण गंभीर जखमी झाले आहेत. सोशल मीडियावर व्हायरल होत असलेल्या या व्हिडिओंमधून अपघाताची भीषणता आणि प्रत्यक्ष घटनाक्रम उघड झाला आहे. पहिल्या क्लिपमध्ये भरधाव वेगात असलेली ही बेस्ट बस उजवीकडे वळण घेत असताना, चालकाचे बसवरील नियंत्रण अचानक सुटते आणि बस सैरावैरा धावू लागल्याचे स्पष्टपणे पाहायला मिळते.
View this post on Instagram
अनियंत्रित झालेली ही बस त्यानंतर रस्त्यावरील इतर वाहनांना अक्षरशः चिरडत पुढे गेल्याचा थरार दुसऱ्या व्हिडिओमध्ये कैद झाला आहे. प्रत्यक्षदर्शी आणि कॅमेऱ्यातील दृश्यांनुसार, या मृत्यूच्या रुपात आलेल्या बसने अनेक वाहनांचे मोठे नुकसान केले आहे. धडक बसलेल्या वाहनांमध्ये एक अॅक्टिव्हा स्कूटर, एक इलेक्ट्रिक बाईक, एक टॅक्सी, मारुती बलेनो कार आणि एका इलेक्ट्रिक कारचा समावेश आहे. घटनास्थळाची जी दृश्ये समोर आली आहेत, त्यामध्ये उलटलेली टॅक्सी आणि चक्काचूर झालेली दुचाकी अपघाताची भीषणता सांगून जाते. रस्त्यावरील दुचाकी आणि चारचाकी वाहनांना उडवल्यानंतर ही बस तिथेच थांबली नाही. रस्त्याच्या कडेला सुरू असलेल्या बांधकाम परिसरातील लोखंडी बॅरिकेड्स तोडून ही बस पुढे एका उत्खनन करणाऱ्या ट्रकला (Excavation Truck) जाऊन भिडली. ही धडक इतकी भयंकर होती की, ट्रकचा काही भाग थेट बसची समोरील काच फोडून आत शिरल्याचे पाहायला मिळाले. या दुर्दैवी घटनेत रस्त्यावरील अनेक वाहनांचे अतोनात नुकसान झाले असून संपूर्ण परिसरात एकच खळबळ उडाली आहे.
मुंबई : दादर येथील प्लाझा परिसरात सोमवारी भीषण अपघात घडल्याने एकच खळबळ उडाली. भरधाव वेगाने आलेल्या एका बसने तीन दुचाकी, एक टॅक्सी आणि ओला-उबेर वाहनाला ...
या भयंकर अपघातानंतर जखमींना तातडीने उपचारांसाठी सायन रुग्णालयात (Sion Hospital) दाखल करण्यात आले. सायन रुग्णालयाचे सहाय्यक वैद्यकीय अधिकारी (AMO) डॉ. रणधीर यांनी दिलेल्या माहितीनुसार, एकूण चार जणांना उपचारासाठी रुग्णालयात आणले गेले होते. त्यापैकी २२ ते २५ वयोगटातील एका अज्ञात तरुणाचा रुग्णालयात पोहोचण्यापूर्वीच मृत्यू झाला. तर, ऋषभ गुप्ता नावाचा सुमारे २५ ते ३० वर्षांचा तरुण डोक्याला गंभीर मार लागल्याने मृत्यूशी झुंज देत असून त्याची प्रकृती सध्या अत्यंत चिंताजनक आहे. याव्यतिरिक्त, जखमी झालेल्या इतर दोन व्यक्तींमध्ये 'बेस्ट'चेच निरीक्षक असलेले ४८ वर्षीय सतीश वाघमारे आणि ५० वर्षीय महेश डोईफोडे यांचा समावेश आहे. या सर्वांवर सध्या रुग्णालयात कसून वैद्यकीय उपचार सुरू आहेत.
दरम्यान, या भयंकर घटनेला कारणीभूत ठरलेल्या बेस्ट बस चालकाला पोलिसांनी तात्काळ ताब्यात घेतले असून त्याला अटक करण्यात आली आहे. हा अपघात नेमका कोणत्या कारणामुळे झाला, याचा सखोल तपास आता पोलीस यंत्रणा करत आहेत. बसचा अतिवेग, वाहनातील एखादा तांत्रिक बिघाड की चालकाची निष्काळजीपणाची चूक, यापैकी नेमक्या कोणत्या कारणाने हा अनर्थ ओढवला, हे शोधून काढण्यासाठी पोलिसांकडून कसून चौकशी आणि पुढील तपास युद्धपातळीवर सुरू आहे.
