बॉलिवूड (Bollywood) अभिनेत्री कंगना रणौतचा (Kangana Ranaut) आगामी ‘भारत भाग्य विधाता’ (Bharat Bhagy Vidhata) हा चित्रपट सध्या चर्चेत असून प्रदर्शनापूर्वीच तो वादाच्या केंद्रस्थानी आला आहे. २ जून रोजी या चित्रपटाचा ट्रेलर प्रदर्शित झाला असून १२ जूनला हा चित्रपट प्रेक्षकांच्या भेटीला येणार आहे. मात्र ट्रेलरमधील काही दृश्ये आणि संवादांवर नर्सेस संघटनांनी आक्षेप घेतला आहे.
‘भारत भाग्य विधाता’ हा चित्रपट २००८ मधील मुंबईवरील २६/११ दहशतवादी हल्ल्याच्या पार्श्वभूमीवर आधारित आहे. कामा रुग्णालयातील कर्मचाऱ्यांच्या धैर्याची कथा या चित्रपटातून मांडण्यात आली आहे. कंगना रणौतसोबत मराठी अभिनेत्री गिरीजा ओक हिनेही या चित्रपटात महत्त्वाची भूमिका साकारली असून दोघी नर्सच्या भूमिकेत दिसणार आहेत.
चित्रपटाचा ट्रेलर समोर आल्यानंतर महाराष्ट्र गव्हर्नमेंट नर्सेस फेडरेशनने काही दृश्यांबाबत नाराजी व्यक्त केली आहे. ट्रेलरमधील काही संवाद आणि प्रसंगांमुळे नर्सेसच्या व्यवसायाची प्रतिमा चुकीच्या पद्धतीने दाखवली जात असल्याचा दावा संघटनेने केला आहे. नर्स हा आरोग्य व्यवस्थेतील महत्त्वाचा आणि सन्माननीय घटक असल्याने अशा प्रकारचे चित्रण समाजात चुकीचा संदेश देऊ शकते, असे संघटनेचे म्हणणे आहे.
यासंदर्भात फेडरेशनने मुख्यमंत्री देवेंद्र फडणवीस यांना पत्र पाठवून चित्रपटातील आक्षेपार्ह वाटणारे संवाद आणि दृश्यांमध्ये बदल करण्याची मागणी केली आहे. तसेच चित्रपट प्रदर्शित करण्यापूर्वी तो नर्सेस संघटनांच्या प्रतिनिधींना दाखवावा आणि त्यांच्या सूचनांचा विचार करावा, अशीही मागणी करण्यात आली आहे.
दरम्यान, चित्रपटाच्या निर्मात्यांकडून किंवा कलाकारांकडून याबाबत अद्याप कोणतीही अधिकृत प्रतिक्रिया देण्यात आलेली नाही. त्यामुळे या वादावर पुढे काय भूमिका घेतली जाते, याकडे सर्वांचे लक्ष लागले आहे.