Iran-America War : अमेरिका-इराण चर्चेदरम्यान पाकिस्तानचे गृहमंत्री विशेष संदेश घेऊन तेहरानमध्ये दाखल

पाकिस्तानचे गृहमंत्री मोहसिन नकवी पुन्हा एकदा तेहरान दौऱ्यावर पोहोचले आहेत. फील्ड मार्शल आसिम मुनीर आणि पंतप्रधान शहबाज शरीफ यांचा संदेश पोहोचवण्यासाठी ते इराणला गेले आहेत. पाकिस्तानच्या सर्वोच्च नेतृत्वातील महत्त्वाचे नेते मानले जाणारे नकवी, इराण-अमेरिका संघर्ष सुरू झाल्यापासून तिसऱ्यांदा इराणला भेट देत आहेत. (Iran-America War)

इराणच्या वृत्तसंस्थेच्या माहितीनुसार, मोहसिन नकवी हे पाकिस्तानचे लष्करप्रमुख आसिम मुनीर आणि पंतप्रधान शहबाज शरीफ यांच्याकडून मोज्तबा खामेनेई यांना एक विशेष पत्र सुपूर्द करण्यासाठी तेहरानला पोहोचले आहेत. नकवी यांनी सांगितले, “मी पाकिस्तानचे लष्करप्रमुख आणि पंतप्रधान यांच्याकडून मोज्तबा खामेनेई यांच्यासाठी विशेष पत्र घेऊन इराणमध्ये आलो आहे.” या दौऱ्यात त्यांची इराणच्या वरिष्ठ नेतृत्वासोबतही महत्त्वपूर्ण बैठक होणार असल्याचे वृत्त आहे. (Iran-America War)

मोहसिन नकवी यांचा हा दौरा अशा वेळी होत आहे, जेव्हा अमेरिका आणि इराण यांच्यातील चर्चा अत्यंत नाजूक टप्प्यावर पोहोचली आहे. अमेरिकेचे राष्ट्राध्यक्ष डोनाल्ड ट्रम्प सातत्याने इराणी नेतृत्वावर दबाव टाकत असून, समृद्ध युरेनियम इराणबाहेर हलवण्याची अटही त्यांनी घातली आहे. (Iran-America War)

दरम्यान, अमेरिकेत पाकिस्तानच्या मध्यस्थीच्या भूमिकेवरही प्रश्नचिन्ह उपस्थित केले जात आहे. पाकिस्तानकडून अमेरिका आणि इराण या दोन्ही देशांच्या नेतृत्वाशी सतत संपर्क ठेवला जात आहे. आसिम मुनीर आणि शहबाज शरीफ हे डोनाल्ड ट्रम्प, मार्को रुबिओ आणि जेडी व्हान्स यांच्याशी नियमित संवाद साधत आहेत. त्याचबरोबर इराणचे राष्ट्राध्यक्ष मसूद पेजेशकियन आणि परराष्ट्रमंत्री अब्बास अराघची यांच्याशीही चर्चा सुरू आहे. मात्र, अद्याप कोणताही ठोस निष्कर्ष समोर आलेला नाही. त्यामुळे दोन्ही देशांमध्ये मध्यस्थी करण्याच्या पाकिस्तानच्या प्रयत्नांना अपेक्षित यश मिळताना दिसत नाही. (Iran-America War)

मोहसिन नकवी तेहरानमध्ये पोहोचले असताना इराणकडून संयुक्त अरब अमिराती (यूएई), कतार आणि बहरीनसारख्या खाडी देशांवर क्षेपणास्त्र हल्ले सुरूच असल्याचे सांगितले जात आहे. तसेच होर्मुझ सामुद्रधुनी अद्याप पूर्णपणे खुली झालेली नसल्याने जागतिक अर्थव्यवस्थेवर त्याचा परिणाम होत आहे.तथापि, दिलासादायक बाब म्हणजे ८ एप्रिल रोजी लागू झालेला तात्पुरता युद्धविराम अत्यंत नाजूक स्थितीत असला तरी अद्याप कायम आहे. (Iran-America War)