Gold-Silver Rate : आनंदवार्ता! चांदी १४ हजारांनी कोसळली तर सोन्याचा भाव १.६० लाखांच्या खाली

मुंबई : आंतरराष्ट्रीय घडामोडींमुळे मौल्यवान धातूंच्या बाजारात मोठी उलथापालथ पाहायला मिळत आहे. अमेरिका आणि इराण यांच्यातील वाढत्या तणावामुळे जागतिक आर्थिक बाजारपेठेत अस्थिरता निर्माण झाली असून त्याचा थेट परिणाम सोन्या-चांदीच्या दरांवर झाला आहे. गेल्या आठवडाभरात सोन्याच्या किमतीत मोठी घसरण झाली असून चांदीने तर तब्बल १४ हजार रुपयांची घसरण नोंदवत गुंतवणूकदारांना धक्का दिला आहे. (Gold-Silver Rate)

दिल्ली सराफा बाजारात ९९.९ टक्के शुद्धतेच्या सोन्याचा भाव घसरून १,५९,९०० रुपये प्रति १० ग्रॅमवर बंद झाला. विशेष म्हणजे, अवघ्या एक दिवसापूर्वी सोन्याने १.६० लाख रुपयांचा महत्त्वाचा टप्पा पार केला होता. मात्र जागतिक बाजारातील दबावामुळे त्यात पुन्हा घसरण झाली आहे. आठवडाभरात सोन्याचा भाव जवळपास ३ हजार रुपयांनी म्हणजेच सुमारे २ टक्क्यांनी कमी झाला आहे. (Gold-Silver Rate)

चांदीची मोठी घसरण :

सोन्यापेक्षा चांदीच्या बाजारात अधिक मोठी घसरण दिसून आली. सलग तिसऱ्या व्यवहार सत्रात चांदीच्या किमती कोसळल्या. एका दिवसातच चांदी ५ हजार रुपयांनी स्वस्त झाली असून तिचा भाव २,६०,७०० रुपये प्रति किलोवर आला आहे. संपूर्ण आठवड्याचा विचार केला असता चांदीच्या दरात तब्बल १४ हजार रुपयांची घसरण नोंदवण्यात आली आहे. या घसरणीमुळे दागिने खरेदी करणाऱ्या ग्राहकांना दिलासा मिळाला असला, तरी चांदीच्या ETF आणि इतर गुंतवणूक योजनांमध्ये पैसा गुंतवलेल्या गुंतवणूकदारांचे मोठे नुकसान झाले आहे. (Gold-Silver Rate)

रुपया मजबूत झाल्याचा परिणाम :

बाजार विश्लेषकांच्या मते, भारतीय रिझर्व्ह बँकेने अलीकडेच परदेशी गुंतवणूक आकर्षित करण्यासाठी आणि आर्थिक स्थैर्य राखण्यासाठी काही उपाययोजना जाहीर केल्या आहेत. त्याचा सकारात्मक परिणाम भारतीय रुपयावर झाला असून डॉलरच्या तुलनेत रुपया मजबूत झाला आहे. यामुळे आयात होणाऱ्या मौल्यवान धातूंवरील दबाव कमी झाला आणि सोन्या-चांदीच्या किमती घसरल्या. (Gold-Silver Rate)

तज्ज्ञांचे काय मत?

एचडीएफसी सिक्युरिटीजचे वरिष्ठ विश्लेषक सौमिल गांधी यांच्या मते, अमेरिकेत व्याजदर दीर्घकाळ उच्च पातळीवर राहण्याची शक्यता आणि जागतिक बाजारातील कमकुवत वातावरण यामुळे गुंतवणूकदारांनी सोन्यातील नफावसुली सुरू केली आहे. त्यामुळे सोन्याच्या दरांवर दबाव वाढला आहे. त्यांच्या मते, पुढील काही आठवड्यांत जागतिक आर्थिक घडामोडी, अमेरिकेच्या फेडरल रिझर्व्हची भूमिका आणि मध्यपूर्वेतील तणाव यावर सोन्या-चांदीच्या किमतींची दिशा अवलंबून असेल. (Gold-Silver Rate)

जागतिक बाजारातही दबाव कायम :

आंतरराष्ट्रीय बाजारात हाजिर सोन्याचा भाव किंचित घसरणीसह ४,४७०.७९ डॉलर प्रति औंसवर व्यवहार करत आहे. तर चांदी १ टक्क्यांहून अधिक घसरून ७२.८९ डॉलर प्रति औंसवर आली आहे. सलग दुसऱ्या आठवड्यात जागतिक बाजारात सोन्याला तोटा सहन करावा लागला असून त्याचे पडसाद भारतीय बाजारपेठेतही उमटले आहेत. (Gold-Silver Rate)

ग्राहकांसाठी सुवर्णसंधी?

सोन्या-चांदीच्या दरात झालेल्या या घसरणीमुळे लग्नसराई आणि सणासुदीच्या खरेदीची तयारी करणाऱ्या ग्राहकांसाठी ही एक चांगली संधी मानली जात आहे. मात्र बाजारातील अस्थिरता लक्षात घेता गुंतवणूकदारांनी तज्ज्ञांचा सल्ला घेऊनच गुंतवणुकीचे निर्णय घ्यावेत, असे जाणकारांचे मत आहे. (Gold-Silver Rate)