मुंबईतील कांदिवली भागात असलेल्या धहानुकरवाडी मेट्रो स्टेशनच्या लिफ्टमध्ये एका १७ वर्षीय मुलीचा विनयभंग केल्याची धक्कादायक घटना समोर आली होती. या प्रकरणानंतर मेट्रो परिसरात एकच खळबळ उडाली होती. पोलिसांनी या घटनेचे गांभिर्य लक्षात घेऊन अखेर आरोपीला अटक केली आहे.
मिळालेल्या माहितीनुसार, डोनी सरकार असे या अटक करण्यात आलेल्या आरोपीचे नाव असून, घटनेनंतर तो मुंबई शहरातून फरार झाला होता. कांदिवली पोलिसांच्या एका पथकाने त्याचा माग काढत त्याला पश्चिम बंगालच्या हावडा जंक्शनकडे जाणाऱ्या गीतांजली एक्सप्रेसमधून ताब्यात घेतले. छत्तीसगडमधील रायपूर जंक्शनवर ही ट्रेन थांबली असता पोलिसांनी ही कारवाई केली. आरोपी त्याच्या मूळ गावी पळून जाण्याच्या तयारीत होता.
सोशल मीडियावर FIFA 2026 ची गटवारी तुफान व्हायरल Mumbai : FIFA World Cup 2026 अवघ्या काही दिवसांवर येऊन ठेपला आहे. ११ जून २०२६ पासुन फिफा वर्ल्ड कपची सुरुवात होणार आहे. यात ...
ही घटना २९ मे रोजी सकाळी सुमारे ११.५० वाजता घडली होती. पीडित मुलगी यलो लाईनवरील दहानुकरवाडी मेट्रो स्टेशनच्या लिफ्टमध्ये जात असताना आरोपी आधीपासूनच तिथे उपस्थित होता. लिफ्टमध्ये मुलगी एकटीच असल्याचे पाहून लिफ्टचे दरवाजे बंद होताना त्याने तिच्याशी अयोग्य वर्तन केले. या प्रसंगामुळे घाबरलेल्या मुलीने सुरुवातीला मेट्रो कर्मचाऱ्यांकडे मदत मागितली आणि त्यानंतर पोलीस ठाण्यात जाऊन तक्रार नोंदवली. महा मुंबई मेट्रो ऑपरेशन कॉर्पोरेशन लिमिटेडच्या अधिकाऱ्यांनी या घटनेला दुजोरा दिला असून पोलिसांना तपासासाठी सीसीटीव्ही फुटेज देखील उपलब्ध करून दिले आहे.
दरम्यान मुंबईत बालकांवरील अत्याचाराची आणखी एक घटना समोर आली आहे. अग्रिपाडा परिसरातील क्लासिक टॉवर या निवासी सोसायटीमध्ये एका १३ वर्षीय मुलाला अश्लील चित्रपट दाखवून त्याचा विनयभंग केल्याच्या आरोपाखाली एका ४० वर्षीय व्यक्तीविरोधात पॉक्सो कायद्यांतर्गत गुन्हा दाखल करण्यात आला आहे. पीडित मुलाने हा सर्व प्रकार आपल्या कुटुंबीयांना सांगितल्यानंतर हे प्रकरण उघडकीस आले. याशिवाय मे महिन्याच्या सुरुवातीला देखील पालिकेच्या मुख्यालयात एका महिला कर्मचाऱ्याने वरिष्ठ अधिकाऱ्यावर गैरवर्तनाचा आरोप केला होता, ज्यावरून विनयभंगाचा गुन्हा दाखल करण्यात आला होता. या वाढत्या घटनांमुळे नागरिकांमधून चिंता व्यक्त केली जात आहे.