Maharashtra State Commission for Women : माजी आयपीएस अधिकारी मीरा बोरवणकर यांची महाराष्ट्र राज्य महिला आयोगाच्या अध्यक्षपदी नियुक्ती झाल्याची बातमी गेल्या काही दिवसांपासून सोशल मीडियावर वाऱ्यासारखी पसरत आहे. मात्र, ही बातमी पूर्णपणे खोटी आणि निराधार असल्याचे आता स्पष्ट झाले आहे. महाराष्ट्र शासनाच्या माहिती व जनसंपर्क महासंचालनालयाने यासंदर्भात अधिकृत स्पष्टीकरण दिले असून, अशा कोणत्याही नियुक्तीचा निर्णय झालेला नसल्याचे जाहीर केले आहे. तसेच या अफवा असल्याचे डॉ. मीरा बोरवणकर यांनीदेखील कळविले आहे.
नेमकं प्रकरण काय ?
पुण्यातील नसरापूर येथे ४ वर्षीय चिमुकलीवर झालेल्या अत्याचार आणि हत्येच्या घटनेनंतर राज्यात संतापाची लाट उसळली होती. या पार्श्वभूमीवर राष्ट्रवादी काँग्रेसचे (शरद पवार गट) आमदार रोहित पवार यांनी पीडित कुटुंबाची भेट घेतली. यावेळी त्यांनी महिला आयोगाचे अध्यक्षपद रिक्त असल्याबद्दल राज्य सरकारवर टीका केली होती.
यावेळी रोहित पवार यांनी मागणी केली होती की, “महिला आयोगावर कोणत्याही राजकीय व्यक्तीची नियुक्ती न करता, मीरा बोरवणकर किंवा मेधा गाडगीळ यांच्यासारख्या अनुभवी प्रशासकीय अधिकाऱ्याची नियुक्ती करावी.” या विधानानंतर सोशल मीडियावर मीरा बोरवणकर यांची नियुक्ती झाल्याच्या पोस्ट व्हायरल होऊ लागल्या. मात्र, एएनआयने सुध्दा या वृत्ताचे खंडन केले आहे.
तर राज्य महिला आयोगाच्या अध्यक्षपदी माझी नियुक्ती झाली, ही अफवा असून मी सध्या उन्हाळी सुट्टीत न्यूझीलंडमध्ये असल्याचे डॉ. मीरा बोरवणकर यांनी कळविले आहे. वरील पदाची जबाबदारी स्वीकारण्यासंदर्भात आपल्याला राज्य शासनाकडून विचारणा झालेली नसल्याचेही त्यांनी स्पष्ट केले.
मीरा बोरवणकर कोण आहेत ?
मीरा बोरवणकर या १९८१ च्या बॅचमधील महाराष्ट्र केडरच्या पहिल्या महिला आयपीएस अधिकारी आहेत. महाराष्ट्रात त्यांना ‘लेडी सुपरकॉप’ म्हणून ओळखले जाते. १९९४ मध्ये जळगावमधील बहुचर्चित सेक्स स्कँडल उघडकीस आणण्यात आणि गुन्हेगारांना जेरबंद करण्यात त्यांची भूमिका अत्यंत महत्त्वाची होती. मुंबई गुन्हे शाखेच्या प्रमुख असताना त्यांनी दाऊद इब्राहिम आणि छोटा राजन यांच्या टोळ्यांचे कंबरडे मोडले. अबू सालेम आणि इक्बाल मिर्ची यांच्या प्रत्यार्पणातही त्यांचा मोठा वाटा होता. येरवडा तुरुंग महानिरीक्षक असताना याकूब मेमनच्या फाशीची प्रक्रिया त्यांच्याच देखरेखीखाली पार पडली होती.
निवृत्तीनंतर त्यांनी लिहिलेल्या ‘मॅडम कमिशनर’ या पुस्तकात उपमुख्यमंत्री अजित पवार यांच्यावर केलेल्या काही आरोपांमुळे त्या पुन्हा एकदा राजकीय वर्तुळात चर्चेत आल्या होत्या.