चालकाचे वाहनावरील नियंत्रण सुटून भीषण अपघात, २५ वर्षीय चालकाचा चिरडून मृत्यू

श्रीवर्धन – श्रीवर्धन येथे चालकाचे वाहनावरील नियंत्रण सुटून भीषण अपघात घडल्याची घटना घडली आहे. म्हसळा मार्गावरील बोडणीची डाग येथे एका तीव्र उतारावर ट्रेलर चालकाचे वाहनावरील नियंत्रण सुटले आणि ट्रेलर पीकअप टेम्पोवर कोसळला. या भीषण अपघातात टेम्पो चालकाचा चिरडून मृत्यू झालाय. ही दुर्दैवी घटना आज सकाळी ८ वाजेच्या सुमारास घडली. (Srivardhan accident)

प्राथमिक माहितीनुसार, श्रीवर्धनच्या बागमांडला – बाणकोट खाडी वर पुलाचे काम सुरू असून नवी मुंबई येथून बागमांडला येथे पुलाचे साहित्य घेऊन जाणारा ट्रेलर चालक तौफेल सलाउद्दीन अहमद (कळंबोली) याने श्रीवर्धन म्हसळा हा घाट रस्ता व वळणदार तीव्र उताराचा असून देखील आपल्या ताब्यातील ट्रेलर (एम एच ४६ बी बी ४७१२) निष्काळजीपणे श्रीवर्धन च्या दिशेने आणत होता. (Srivardhan accident)

बोडणीची डाग येथील एका वळणदार तीव्र उतारावर चालकाचा ट्रेलर वरील ताबा सुटल्याने ट्रेलर ने अगोदर एका चारचाकी ला धडक दिली व आंबा वाहतूक करणाऱ्या एम एच ०६ जी ९३२० या क्रमांकाच्या महेंद्रा पीक अप टेम्पोवर थेट ट्रेलर कोसळला. या भीषण अपघातात बागमांडला येथील टेम्पो चालक अजय भालचंद्र जाधव (वय २५) हा जागीच ठार झालाय.