धुळे : आजवर परीक्षेत कॉपी करण्याच्या अनेक जुन्या पद्धती समोर आल्या आहेत, मात्र आता कॉपीबहाद्दरांनी यासाठी चक्क अत्याधुनिक तंत्रज्ञानाचा म्हणजेच 'आर्टिफिशियल इंटेलिजन्स'चा (AI) आधार घेतल्याचा अत्यंत धक्कादायक प्रकार धुळे शहरात उघडकीस आला आहे. उच्च न्यायालयातील लिपिक आणि शिपाई पदांच्या भरती परीक्षेदरम्यान मोबाईल फोन आणि 'एआय' तंत्रज्ञानाच्या मदतीने कॉपी करणाऱ्या एका उमेदवाराला भरारी पथकाने रंगेहात पकडले आहे. याप्रकरणी संबंधित उमेदवाराविरुद्ध धुळे शहर पोलीस ठाण्यात गुन्हा दाखल करण्यात आला आहे.
Mumbai Pune Missing Link : मुंबई-पुणे द्रुतगती मार्गाला पूर्णतः ‘ऍक्सेस कंट्रोल’ बनवणारा महत्त्वाकांक्षी असलेला मिसिंग लिंक प्रकल्प (Mumbai Pune Missing Link Raod) आजपासून सुरु झाला ...
असा घडला प्रकार
धुळे शहरातील जिजामाता कन्या हायस्कूल येथील परीक्षा केंद्रावर उच्च न्यायालयाच्या लिपिक आणि शिपाई पदांसाठी लेखी परीक्षा आयोजित करण्यात आली होती. या परीक्षेला बसलेला नाजीब अली तबसुम सय्यद (रा. धुळे) या उमेदवाराने अतिशय चतुराईने परीक्षा केंद्रात मोबाईल फोन लपवून नेला होता. परीक्षा सुरू असताना त्याने गुपचूप प्रश्नपत्रिकेचा फोटो काढला आणि तो इंटरनेटवर 'गुगल' व 'एआय' आधारित टूल्सवर (AI Tools) अपलोड करून प्रश्नांची उत्तरे शोधण्याचा प्रयत्न चालवला होता.
भरारी पथकाची सतर्कता
परीक्षा सुरू असताना केंद्रावर पाहणी करण्यासाठी आलेल्या भरारी पथकाला एका वर्गात संशयास्पद हालचाली दिसून आल्या. त्यांनी क्षणाचाही विलंब न लावता याची माहिती तत्काळ परीक्षा पर्यवेक्षकांना दिली. त्यानंतर संशयित उमेदवाराची कसून तपासणी करण्यात आली असता, त्याच्याकडे मोबाईल फोन आढळून आला. मोबाईलची तपासणी केली असता, त्याने प्रश्नपत्रिकेचे फोटो काढून 'एआय'च्या माध्यमातून कॉपी केल्याचे स्पष्ट झाले.
पोलिसांत गुन्हा दाखल
या प्रकारानंतर परीक्षा केंद्रावर एकच खळबळ उडाली. या संपूर्ण प्रकरणाची माहिती देताना पोलीस उपविभागीय अधिकारी राजकुमार उपासे यांनी सांगितले की, कॉपी करताना रंगेहात पकडण्यात आलेला परीक्षार्थी नाजीब अली तबसूम सय्यद याच्या विरोधात धुळे शहर पोलीस ठाण्यात फसवणूक आणि इतर संबंधित कायद्यांच्या कलमांन्वये रीतसर गुन्हा दाखल करण्यात आला आहे. सध्या पोलीस या प्रकरणाचा पुढील तपास करत असून, या गैरप्रकारात आणखी कोणाचा सहभाग आहे का, यादिशेनेही चौकशी केली जात आहे.
