नाशिक : देवळाली कॅम्प परिसरातून धक्कादायक घटना समोर आली आहे. भारतीय लष्कराच्या देवळाली कॅम्प येथील मिलिटरी हॉस्पिटलमध्ये जवानांच्या उपचारासाठी पाठविलेल्या तब्बल ८१ लाख ९९ हजार रुपयांच्या महागड्या ‘इन्शुलिन’ इंजेक्शन्सची चोरी करून त्यांचा काळाबाजार केल्याची धक्कादायक घटना समोर आली आहे. याप्रकरणी देवळाली कॅम्प पोलीस ठाण्यात गुन्हा दाखल करण्यात आला आहे. (Deolali Camp Police Station)
धक्कादायक म्हणजे, दोन वर्षांच्या अंतर्गत तपासानंतर या प्रकरणाचा छडा लागला असून, यात एका निलंबित लष्करी शिपायाचा आणि एका सेवानिवृत्त कर्मचाऱ्याचा मुख्य सहभाग असल्याचे निष्पन्न झाले आहे. त्यामुळे एकच खळबळ उडाली आहे. (Nashik Crime)
नेमकी घटना काय ?
मुंबईतील कांदिवली येथील आर्मीच्या मेडिकल स्टोअर डेपोतून मे २०२४ मध्ये देवळाली कॅम्प येथील मिलिटरी हॉस्पिटलसाठी १३३ बॉक्समध्ये विविध प्रकारची औषधे पाठवण्यात आली होती. यामध्ये मधुमेह नियंत्रित करण्यासाठी वापरली जाणारी अत्यंत महागडी ‘इन्शुलिन डेग्लुडेक’ आणि ‘ह्युमन इन्शुलिन’ अशी एकूण बारा हजार ६६२ इंजेक्शन्स होती. या औषधांची सुरक्षित ने आण करण्याची जबाबदारी संबंधित विभागावर असताना, संशयित नीरजने संगनमत करून ही औषधे परस्पर लंपास केली.
तत्कालीन लष्करी शिपाई नीरज सिंग (सध्या निलंबित) आणि सेवानिवृत्त कर्मचारी संशयित विनायक विठ्ठल कांबळे यांनी ही औषधे मिलिटी हॉस्पिटलमध्ये जमा करण्याऐवजी देवळाली कॅम्पच्या बनात चाळीतील घरी उतरवली. तेथे औषधांचे मूळ बॉक्स फोडून त्यांची पुन्हा ‘रि-पॅकिंग’ केली. ही औषधे टाटा एस टेम्पोतून (एमएच १५ जेसी ६१८१) पुण्यातील कलाशंकर नगरातील नीरज सिंग याच्या घरी पाठवण्याचा कट रचल्याचे आर्मी इंटेलिजन्सच्या तपासात समोर आले. वरिष्ठ पोलीस निरीक्षक श्रीनिवास देशमुख यांच्या मार्गदर्शनाखाली आता प्रकरणाच तपास गुन्हे शोध पथकाकडे वर्ग करण्यात आला आहे. (Nashik Crime)
जप्त औषधांचा तपशील
५२ लाख १३ हजार रुपये किमतीचे १० हजार ६९८ नग ह्यूमन इन्शुलिन
१५ लाख ९७, हजार १२० रुपये किमतीचे ९७२ नग इन्शुलिन
१३ हजार ८८ हजार ८०० रुपये किमतीचे ९९२ मग इन्शुलिन
एकूण रक्कमः ८१ लाख ९९ हजार रुपये
दोन वर्षांच्या तपासानंतर कारवाई
या चोरीचा संशय आल्यानंतर लष्करी गुप्तचर यंत्रणा आणि वरिष्ठ अधिकाऱ्यांनी मागील दोन वर्षे या प्रकरणाचा पाठपुरावा केला. देवळालीतील हॉस्पिटलचे सिनिअर रजिस्ट्रार कर्नल दविंदर भारद्वाज यांच्या सूचनेनुसार सुभेदार रामराव निवृत्ती शिंदे यांनी फिर्याद दिली आहे. त्यानुसार नीरजसह कांबळेवर गुन्हा नोंद झाल आहे.