नाशिक : भद्रकाली (Nashik) येथील शिंगाडा परिसरात मोबाईलच्या गुंगीत असलेल्या सतरा वर्षीय मुलाचा भीषण अपघात झालाय. घराच्या बाल्कनीत मोबाइलवर ‘सर्फिंग’ करताना अचानक तोल गेल्याने हा युवक थेट चौथ्या मजल्यावरून खाली कोसळला. अरबाज सलीम खान असे मुलाचे नाव असून त्याची प्रकृती चिंताजनक आहे.
नेमकं काय घडलं ? प्राथमिक माहितीनुसार, भद्रकाली (Nashik) येथील शिंगाडा तलाव परिसरातील म्हसोबावाडीत राहणारा अरबाज सलीम खान हा रविवारी (दि. २६) सकाळी साडेदहाच्या सुमारास घराच्या बाल्कनीत होता. नेहमीप्रमाणे तो मोबाइलवर इंटरनेट सर्फिंग करण्यात मग्न होता. मोबाइलमध्ये तो इतका हरवून गेला, की त्याला आपण बाल्कनीच्या अगदी कडेला बसलो आहोत, याचेही भान राहिले नाही. त्याच नादात अचानक तोल जाऊन तो चौथ्या मजल्यावरून खाली कोसळला. खाली पडताना दुसऱ्या मजल्यावरील एका पत्र्याच्या शेडवर तो जोराने आदळला.
या गंभीर अपघातामुळे (Accident) पत्र्याचा मोठा आवाज झाला. हा आवाज ऐकून शेजारी राहणारे धुगेस यादव यांनी तातडीने घराबाहेर धाव घेतली. त्यांना अरबाज रक्ताच्या थारोळ्यात आणि निपचित पडलेला दिसला. यादव आणि इतर रहिवाशांनी अरबाजला तत्काळ जिल्हा शासकीय रुग्णालयात (Hospital) दाखल केले. डॉक्टरांनी दिलेल्या माहितीनुसार, अरबाजच्या डोक्याला, छातीला आणि पायाला गंभीर दुखापत झाली आहे. त्याच्यावर सध्या अतिदक्षता विभागात उपचार सुरू आहेत. मात्र, त्याची प्रकृती चिंताजनक असल्याचे डॉक्टरांनी सांगितले आहे.
दरम्यान, घटनेच्या वेळी अरबाज घरात एकटाच होता. त्याचे कुटुंबीय काही कामानिमित्त बाहेर गेले होते. माहिती मिळताच भद्रकाली पोलिसांनी घटनास्थळी धाव घेऊन पंचनामा केला. ही घटना अपघात आहे की अन्य संशयास्पद प्रकार याचा अधिक तपास भद्रकाली पोलीस करत आहेत.
