मुंबई : मुंबईतील ब्रिटीशकालिन रस्त्यांची तसेच वास्तूंची नावे बदलण्याचा सपाटा सुुर असतानाच आता केईएम रुग्णालयाचेही नाव बदलण्यात येणार आहे. परळ येथील किंग एडवर्ड मेमोरियल अर्थात के. ई. एम. रुग्णालय रुग्णालयाचे नामकरण 'कौशल्यश्रेष्ठ एकलव्य स्मारक रुग्णालय' केले जाणार आहे. मात्र हे नामकरण केले जाणार असले तरी इंग्रजीतील संशिप्त नाव हे के.ई.एम असेच राहणार आहे.
राज्याच्या कौशल्य, रोजगार, उद्योजकता व नाविन्य मंत्री मंगलप्रभात लोढा यांनी महापालिका सार्वजनिक आरोग्य समिती अध्यक्षांना पत्र लिहून स्वदेशी वारसांच्या सुसंगततेसाठी केईएम रुग्णालयाचे पुनर्नामकरण करण्याची मागणी केली आहे. हे पत्र आता सार्वजनिक आरोग्य समितीच्या बैठकीपुढे मंजुरीसाठी ठेवण्यात आले आहे. या पत्रामध्ये लोढा यांनी असे म्हटले आहे की, स्वदेशी' या प्रेरणादायी संकल्पनेच्या प्रभावाखाली आपला देश समृध्द स्वदेशी वारसा पुनर्प्रस्थापित आणि गौरव करण्याच्या दिशेने वाटचाल करत आहे. त्यादृष्टीने सार्वजनिक संस्थांच्या परकीय नावांचे पुनर्नामकरण करणे आवश्यक आहे. आजमितीपर्यंत अनेक संस्था वसाहतवादी काळातील नावांचा वापर करत आहे. जे दास्याच्या काळाची आठवण करून देतात. या वास्तुंना देण्यात येणाऱ्या नावांची जागा ही आपली संस्कृती, मुल्ये आणि प्रेरणादायी इतिहास जपण्याच्या दृष्टीने ऐतिहासिक व्यक्तींना सन्मान देणाऱ्या नावांनी घेतली पाहिजे. याकरता , किंग एडवर्ड मेमोरियल (के.ई.एम.) रुग्णालय या मुंबईतील संस्थेचे पुनर्नामकरण झाल्यास भारतीय इतिहास आणि संस्कृतीतून निवडलेले नाव भविष्यातील पिढ्यांना प्रेरणा देत राहील.
त्यामुळे , किंग एडवर्ड मेमोरियल (के. ई. एम. रुग्णालय) रुग्णालयाचे 'कौशल्यश्रेष्ठ एकलव्य स्मारक रुग्णालय' (केईएम) असे पुनर्नामकरण करण्यात यावे,असे म्हटले आहे.
