IPL 2026 Wanindu Hasaranga : लखनऊची डोकेदुखी वाढली! स्टार स्पिनर हसरंगा उर्वरित स्पर्धेतून बाहेर

श्रीलंकेचा लेगस्पिनर वानिंदू हसरंगा (Wanindu Hasaranga) दुखापतीमुळे चालू आयपीएल हंगामातून बाहेर पडला आहे. त्याच्या फ्रँचायझी लखनऊ सुपर जायंट्स ने याची अधिकृत पुष्टी केली आहे. फेब्रुवारी महिन्यात झालेल्या हॅमस्ट्रिंग दुखापतीमुळे हसरंगा अद्याप पूर्णपणे सावरू शकलेला नाही. लखनऊ सुपर जायंट्स पुढील २४-४८ तासांत हसरंगाच्या जागी पर्यायी खेळाडूची घोषणा करू शकतात.

संघाचे ग्लोबल डायरेक्टर टॉम मूडी यांनी कोलकाता नाइट रायडर्स विरुद्धच्या सामन्यादरम्यान आयपीएल प्रसारकाला सांगितले की, “वानिंदू हसरंगा (Wanindu Hasaranga) संघात सहभागी होऊ शकणार नाहीत आणि त्यांच्या जागी दुसरा खेळाडू घेण्याची प्रक्रिया आम्ही पुढील २४ ते ४८ तासांत पूर्ण करू.” हसरंगा जवळपास दोन महिन्यांपासून स्पर्धात्मक क्रिकेटपासून दूर आहे. वृत्तांनुसार, तो अद्याप गोलंदाजी करण्यास सक्षम नाही आणि त्याने श्रीलंका क्रिकेटकडून अनापत्ती प्रमाणपत्र (NOC) साठीही अर्ज केलेला नाही.

अहवालांनुसार, दक्षिण आफ्रिकेचा फिरकीपटू जॉर्ज लिंडे याला हसरंगाच्या पर्याय म्हणून संघात सामील करण्याची शक्यता आहे. या डावखुऱ्या गोलंदाजाने अद्याप आयपीएलमध्ये एकही सामना खेळलेला नाही. त्याने शेवटचा टी-२० सामना न्यूझीलंडविरुद्धच्या द्विपक्षीय मालिकेत खेळला, ज्यामध्ये चार डावांत त्याला केवळ एकच विकेट मिळाली होती. तो टी-२० विश्वचषकातही खेळलेला आहे. गेल्या १२ महिन्यांत तो SA20, ‘द हंड्रेड’, ‘मेजर लीग क्रिकेट’ आणि PSL अशा विविध फ्रँचायझी लीग्समध्ये सहभागी झाला होता.

लखनऊ सुपर जायंट्सने मागील लिलावात हसरंगाला (Wanindu Hasaranga) २ कोटी रुपयांत खरेदी केले होते, मात्र दुखापतीमुळे तो संघात सहभागी होऊ शकला नाही. फेब्रुवारी-मार्चमध्ये झालेल्या टी-२० विश्वचषकादरम्यान श्रीलंकेच्या पहिल्याच सामन्यात डाव्या हॅमस्ट्रिंगला दुखापत झाल्यापासून तो मैदानापासून दूर आहे.

हसरंगाने आपल्या आयपीएल कारकिर्दीत एकूण ३७ सामने खेळले असून २४.३२ च्या सरासरीने ४६ विकेट्स घेतल्या आहेत. या काळात त्याने एकदा पाच विकेट्स घेण्याची कामगिरी केली आहे. मागील हंगामात तो राजस्थान रॉयल्स चा भाग होता, तर २०२१ ते २०२३ दरम्यान तो रॉयल चॅलेंजर्स बंगळुरू कडून खेळला होता.