या प्रकारानंतर गायत्री प्रचंड घाबरलेली. या संपूर्ण घटनेची माहिती गायत्रीनं सोशल मिडिया पोस्टच्या माध्यमातून चाहत्यांना दिली होती पण आता तिने या प्रकरणात FIR दाखल करणार नसल्याचं सांगितलं आहे.
आता गायत्रीनं आणखी एक पोस्ट शेअर करत या प्रकरणात नेमकं काय घडलंय त्याचे अपडेट्स दिले आहेत. या पोस्टमध्ये गायत्रीनं म्हटलंय की, 'हॅलो! माझ्या मागील पोस्टसंदर्भात एक अपडेट... तर, तो ड्रायव्हर दुपारपर्यंत वेगवेगळ्या नंबरवरून मला फोन करत होता. त्यानं माझा नंबर एका ड्रायव्हर्सच्या ग्रुपवर सुद्धा शेअर केला. त्यानंतर त्याचे फोन आणखीनच वाढले.अनेक तास हा भयानक अनुभव आल्यानंतर, अखेरीस माझ्या एका पोलीस अधिकारी मित्रानं मला मदत केली.
त्या माणसानं अखेर मला फोन करणं थांबवलं. जे काही घडलं, ते विसरण्याचा मी आणि माझे कुटुंब अजूनही प्रयत्न करत आहोत. तुमच्या प्रचंड पाठिंब्याबद्दल तुम्हा सर्वांचे आभार. मी या व्यक्तीविरुद्ध एफआयआर दाखल करत नाहीये, कारण मला यावर आणखी वेळ किंवा शक्ती वाया घालवायची नाहीये, असंही गायत्रीनं म्हटलं आहे.
गायत्री दातारला गुरुवारी म्हणजेच ९ एप्रिल रोजी सकाळी मुंबईहून पुण्याला जायचं होतं. त्यासाठी तिने एका प्रसिद्ध ऑनलाइन अॅपवरून कॅब बुक केली होती. मात्र, पॅकिंगला वेळ लागणार असल्याचं लक्षात आल्यावर तिनं कॅब येण्यापूर्वीच ती कॅन्सल केली. या साध्या कारणावरून संबंधित ड्रायव्हर संतापला आणि त्याने गायत्रीला मानसिक त्रास देण्यास सुरुवात केली.
गायत्रीनं हा प्रकार सोशल मीडियावर शेअर केला. इन्स्टाग्राम स्टोरीमध्ये तिनं घडलेला प्रकार सांगितला होता. कॅब रद्द केल्यापासून तो ड्रायव्हर गेल्या २-३ तासांपासून मला वेगवेगळ्या नंबरवरून सतत फोन करत आहे. त्याने मला फोनवर अत्यंत गलिच्छ भाषेत शिवीगाळ केली. मला आता माझ्या स्वतःच्या सोसायटीतून बाहेर पडायलाही भीती वाटतेय. मी प्रचंड घाबरले असून मला रडू येत आहे, असं अभिनेत्री गायत्री दातारनं त्या पोस्टमध्ये म्हटलं होतं.
