Chandrashekhar Bawankule : अवैध मुरुम उत्खनन दोषी अधिकाऱ्यांचीनंतरच बडतर्फी

 सोलापूरमधील चिंचोली एमआयडीसीमधील प्रकार  महसूलमंत्री चंद्रशेखर बावनकुळे यांनी दिले आदेश  २०० कोटींच्या दंड वसुलीसाठी मालमत्तेवर बोजा चढविण्याचे निर्देश

मुंबई : चिंचोली एमआयडीसीमध्ये झालेल्या बेकायदा मुरूम उत्खनन आणि वाहतूक प्रकरणी महसूलमंत्र्यांनी अत्यंत आक्रमक पवित्रा घेतला आहे. या घोटाळ्यात सहभागी असलेल्या आणि कर्तव्यात कसुरी करणाऱ्या दोषी अधिकाऱ्यांवर थेट बडतर्फीची कारवाई करण्याचे आदेश महसूलमंत्री चंद्रशेखर बावनकुळे यांनी दिले आहेत. तसेच, संबंधित कंपन्यांकडून २०० कोटी रुपयांचा दंड वसूल करण्यासाठी त्यांच्या मालमत्तेवर बोजा चढविण्याचे निर्देशही त्यांनी प्रशासनाला दिले आहेत.

आमदार राजू खरे यांनी विधानसभेत लक्षवेधी सूचनेद्वारे चिंचोली एमआयडीसीतील अवैध उत्खननाचा मुद्दा उपस्थित केला होता. याबाबत महसूलमंत्र्यांच्या अध्यक्षतेखाली मंत्रालयात बैठक आयोजित करण्यात आली होती. या बैठकीत महसूलमंत्र्यांनी हे आदेश दिले. बैठकीला सोलापूरचे जिल्हाधिकारी कार्तिकेयन तसेच मंत्रालयातील वरिष्ठ अधिकारी उपस्थित होते.

२० लाख ब्रासचा अवैध उपसा आणि ५०० कोटींच्या महसुलाचे नुकसान

बैठकीत आमदार राजू खरे म्हणाले की, "चिंचोली एमआयडीसीमध्ये तब्बल २० लाख ब्रास मुरुमाचा अवैध उपसा झाला आहे. मोठ्या प्रमाणात खड्डे खोदून मुरुम काढल्यामुळे नवीन उद्योगांना जागा मिळणे कठीण झाले आहे. यामुळे नियोजित १०० उद्योग येऊ शकले नाहीत आणि शासनाचा ५०० कोटी रुपयांचा अपेक्षित महसूल बुडाला आहे. विनापरवाना उत्खनन करणाऱ्या कंपन्यांवर गुन्हे दाखल करणे आवश्यक आहे."

 ४३ कोटींचा दंड १० लाखांवर कसा आला? मंत्र्यांकडून चौकशीचे आदेश

या प्रकरणातील धक्कादायक बाब म्हणजे, एका प्रकरणात ४३ कोटी रुपयांचा दंड निश्चित करण्यात आला असताना तो केवळ १० लाख रुपयांपर्यंत खाली आणला गेला. या संशयास्पद बाबीची सखोल चौकशी करण्याचे आदेश महसूलमंत्र्यांनी दिले आहेत. तसेच, या कालावधीत जे अधिकारी कार्यरत होते, त्यांची यादी सादर करून त्यांच्यावर कठोर कारवाई करण्याचे संकेत त्यांनी दिले आहेत.