मुंबई : २८ जानेवारी २०२६ महाराष्ट्रासाठी काळा दिवस ठरला. बारामतीमध्ये एका विमानाचा अपघात झाला आणि संपूर्ण महाराष्ट्र हळहळला. महाराष्ट्र राज्याचे माजी उपमुख्यमंत्री अजित पवार यांचे २८ जानेवारी २०२६ रोजी बारामती येथे विमान अपघातात दुर्दैवी निधन झाले. महाराष्ट्राचे लाडके अजित दादा सगळ्यांना सोडून गेले. या दुर्दैवी अपघाताबाबत अनेक शंका कुशंका, घातपाताचे अनेक संशय निर्माण होत असले तरी अजित पवार यांच्या विमान अपघाताची CID सह अनेक विशेष पथक कसून चौकशी करत आहेत.
माजी उपमुख्यमंत्री अजित पवार यांच्या विमान अपघातानंतर सोशल मीडियावर पसरत असलेल्या अफवांवर सायबर पोलिसांनी कारवाई सुरू केली आहे. या प्रकरणात आक्षेपार्ह आणि दिशाभूल करणारे व्हिडिओ प्रसारित केल्याप्रकरणी एका युट्युबरला अटक करण्यात आली असून, न्यायालयाने त्याला पोलीस कोठडी सुनावली आहे.
विमान अपघातानंतर वाढलेल्या अफवा
तपासादरम्यान काही व्हिडिओ हे कृत्रिम बुद्धिमत्ता (AI) वापरून तयार करण्यात आल्याचे आढळून आले आहे. या व्हिडिओंमधून अपघाताबाबत चुकीचे निष्कर्ष मांडले जात होते, ज्यामुळे समाजात संभ्रम आणि भीतीचे वातावरण निर्माण होण्याची शक्यता होती.
युट्युबरला अटक; नेमकं प्रकरण काय?
मुंबई सायबर पोलिसांनी अशाच एका युट्युबरला अटक केली आहे. उद्धव कापसे असे अटक केलेल्या व्यक्तीचे नाव असून, तो जालना जिल्ह्यातील बदनापूर तालुक्यातील रहिवासी आहे. तो ‘यूके न्यूज टाइम्स’ नावाचे युट्युब चॅनल चालवत होता. त्याने अजित पवार यांच्या अपघातासंदर्भात ब्लॅक बॉक्स आणि तांत्रिक बाबींवर आक्षेपार्ह आणि दिशाभूल करणारे दावे केले होते. विमानाच्या नेव्हिगेशन सिस्टीमबाबत दिलेली माहिती त्याला नेमकी कुठून मिळाली, याचा सायबर पोलिसांकडून तपास सुरू आहे. तसेच या प्रकरणात आणखी कोणाचा सहभाग आहे का, याचाही शोध घेतला जात आहे.
