नांदेड : सुट्ट्यांचा आनंद घेत मित्रांसोबत क्रिकेट खेळणाऱ्या एका लहान मुलावर काळाने घाला घातल्याची धक्कादायक घटना घडली आहे. खेळता खेळता चेंडू घराच्या छतावर गेला, जो आणण्यासाठी हा मुलगा उत्साहाने वर चढला. मात्र, तिथे असलेल्या विजेच्या उच्च दाबाच्या तारेचा त्याला भीषण स्पर्श झाला. विजेचा धक्का इतका जोरदार होता की, क्षणात मुलाच्या अंगातील कपड्यांनी पेट घेतला आणि तो छतावरून खाली कोसळला. भररस्त्यात मुलाच्या शरीरातून धूर निघत असताना आणि तो वेदनेने धडपडत असताना पाहून उपस्थितांच्या काळजाचा ठोका चुकला. विजेचा प्रवाह शरीरात असण्याच्या भीतीने सुरुवातीला कोणाचेही पुढे जाण्याचे धाडस झाले नाही. काही क्षणांपूर्वी मैदानावर उमटणारे हास्य एका भीषण किंकाळीत बदलले असून, या घटनेमुळे संपूर्ण परिसरात भीतीचे आणि चिंतेचे सावट पसरले आहे. चिमुकल्याची प्रकृती गंभीर असून त्याच्यावर उपचार सुरू आहेत.
छतावर चेंडू आणायला गेला आणि...
नांदेडमधील घटनेने पालकांमध्ये भीतीचं वातावरण
बिलोली तालुक्यातील कुंडलवाडी येथे घडलेल्या त्या भीषण वीज अपघातानंतर परिसरात अद्यापही दहशतीचे वातावरण आहे. डोळ्यादेखत मित्राला आगीच्या विळख्यात पाहिल्यानंतर सोबत खेळणाऱ्या इतर लहान मुलांची अक्षरशः बोबडी वळाली. हायव्होल्टेज तारेच्या धक्क्याने अरमान गंभीररीत्या भाजला असून, त्याला तातडीने नांदेड येथील शासकीय रुग्णालयात दाखल करण्यात आले आहे. सध्या अरमानवर अतिदक्षता विभागात (ICU) उपचार सुरू असून त्याची प्रकृती अत्यंत चिंताजनक असल्याचे डॉक्टरांकडून सांगण्यात येत आहे. हसत-खेळत घराबाहेर पडलेला मुलगा थेट मृत्यूच्या दारात पोहोचल्याने खान कुटुंबावर दुःखाचा डोंगर कोसळला आहे. या घटनेने एक गंभीर प्रश्न उपस्थित केला असून, उन्हाळ्याच्या सुट्टीत खेळणाऱ्या मुलांवर पालकांनी डोळ्यात तेल घालून लक्ष ठेवणे किती गरजेचे आहे, हे पुन्हा एकदा अधोरेखित झाले आहे. अरमानच्या जिवासाठी सध्या संपूर्ण जिल्हा प्रार्थना करत असून डॉक्टर त्याला वाचवण्यासाठी शर्थीचे प्रयत्न करत आहेत.