मुंबई : अनेक वर्षांपासून प्रेक्षकांच्या मनावर राज्य करणारी प्रसिद्ध अभिनेत्री सोनाली बेंद्रे (sonali Bendre) आणि तिचे पती गोल्डी (Goldie Behl) बेहल सध्या मोठ्या अडचणीत सापडले आहेत. पुण्यातील मावळमधील सुमारे ३० गुंठे जमिनीच्या व्यवहारात फसवणूक आणि नियमांचं उल्लंघन केल्याचा आरोप या सेलिब्रिटी जोडप्यावर करण्यात आला आहे.
सोनाली बेंद्रे आणि तिचा पती गोल्डी यांच्याविरोधात पुण्यातील वडगाव मावळ न्यायालयात याचिका दाखल करण्यात आला असून मौजे-उकसानमधील सर्व्हे नंबर १२१/१ येथील ३० गुंठे जागा परस्पर खरेदी केल्याचा आरोप चंद्रकांत बाळू शिंदे यांनी केला आहे. या प्रकरणानंतर सोनाली आणि गोल्डी बेहल यांच्या अडचणीत वाढ झाली आहे. पण, सोनाली बेंद्रे यांचा या प्रकरणाशी काहीही संबंध नसल्याचा दावा, त्यांचे वकील राजू शिंदेंनी केला आहे.
१९५७ पासून ही जमीन माझे आजोबा केसू बाबाजी शिंदेंच्या नावावर असल्यानं या जागेवर तक्रारदार चंद्रकांत शिंदेंनी कुळ हक्क दाखवला आहे. मात्र, १९६५ सालीचं मावळच्या तत्कालीन तहसीलदारांनी केसू शिंदे या जागेचे मालक नाहीत, असं स्पष्ट केल्याचा दावा वकील राजू शिंदेंनी केलाय. पैसे उकळण्यासाठी चंद्रकांत शिंदेंकडून सोनाली बेंद्रे आणि गोल्डी बेहल यांच्यावर आरोप केले जात आहेत. असा प्रतिदावा वकील शिंदेंनी केला आहे.
अभिनेत्री सोनाली बेंद्रे आणि गोल्डी बेहल यांच्या बाजूनं वकीलांनी हे सर्व आरोप फेटाळले असून मुळात सोनाली बेंद्रेच्या नावावर ही जमीन नाही, त्यामुळे त्यांचा या प्रकरणाशी काहीही संबंध नाही. असा दावा वकिल राजू शिंदे यांनी केला आहे.
तसेच, ८ जून १९६५ रोजी मावळच्या तत्कालीन तहसीलदारांनी दिलेल्या आदेशानुसार केसू शिंदे हे त्या जमिनीचे मालक नसल्याचं स्पष्ट करण्यात आलं होतं. याबरोबरचं यापूर्वी अनेक वेळा तहसीलदार आणि उपविभागीय अधिकारी स्तरावर अपील करण्यात आलं. मात्र, प्रत्येक वेळी निर्णय त्यांच्या विरोधात गेला असल्याचा दावा बचाव पक्षाकडून करण्यात आला आहे. ऑक्टोबर २०२५ मध्ये मावळच्या तहसीलदारांनी तक्रारदाराचे अपील फेटाळले होते, त्यानंतर पुन्हा उपविभागीय अधिकाऱ्यांकडे हे प्रकरण गेलं. फक्त पैसे उकळण्यासाठी सतत हे प्रकरण उभं केलं जात आहे..." असा प्रतिदावा वकील राजू शिंदेंनी केला आहे. या संपूर्ण प्रकरणानंतर अभिनेत्री सोनाली बेंद्रे आणि पती गोल्डी बेहल यांच्या अडचणीत वाढ झाली आहे.
