नवी मुंबई : ऐरोली पालिका रुग्णालयाच्या ICU मध्ये शंखनाद अन् पूजा; व्हिडिओ व्हायरल झाल्यानंतर खळबळ

नवी मुंबई : नियमांची कडक अंमलबजावणी होणे अपेक्षित असलेल्या रुग्णालयातील अतिदक्षता विभागात (ICU) चक्क पूजा आणि शंखनाद केल्याचा धक्कादायक प्रकार समोर आला आहे. नवी मुंबई महानगरपालिकेच्या ऐरोली येथील रुग्णालयात हा प्रकार घडला असून, याचा व्हिडिओ सोशल मीडियावर तुफान व्हायरल झाला आहे. या घटनेमुळे रुग्णालयातील सुरक्षा आणि वैद्यकीय प्रोटोकॉलवर मोठे प्रश्नचिन्ह उपस्थित झाले आहे.

 

View this post on Instagram

 

A post shared by Prahaar Newsline (@prahaarnewsline)

नक्की काय घडले?

सोशल मीडियावर व्हायरल झालेल्या व्हिडिओनुसार, ऐरोली पालिका रुग्णालयातील आयसीयू विभागाबाहेर एका व्यक्तीने हातात शंख घेऊन तो जोरात वाजवण्यास सुरुवात केली. त्याच वेळी त्याच्यासमोर एक महिला नवजात बाळाला कुशीत घेऊन उभी दिसत आहे. शंखाच्या आवाजामुळे शांतता राखणे बंधनकारक असलेल्या आयसीयू परिसरात एकच गोंधळ उडाला. आवाजाचा जोर इतका होता की, रुग्णालयातील कर्मचारी आणि इतर रुग्णांचे नातेवाईक तिथे जमा झाले. रुग्णालयातील आयसीयू हा अत्यंत संवेदनशील विभाग मानला जातो. येथे संसर्ग रोखण्यासाठी (Infection Control) आणि रुग्णांच्या शांततेसाठी कडक नियम असतात. मात्र, अशा ठिकाणी शंख वाजवून पूजा करणे हे वैद्यकीय नियमांचे उल्लंघन असल्याचे बोलले जात आहे. यामुळे तिथे उपचार घेत असलेल्या इतर गंभीर रुग्णांना त्रास होण्याची शक्यता नाकारता येत नाही.

प्रशासन काय पाऊल उचलणार?

या घटनेचा व्हिडिओ व्हायरल झाल्यानंतर पालिका प्रशासनावर टीकेची झोड उठली आहे. या प्रकरणाची गंभीर दखल घेत प्रशासनाने तपास सुरू केला आहे. आयसीयू सारख्या ठिकाणी एखादी व्यक्ती शंख घेऊन कशी काय पोहोचली? त्यावेळी सुरक्षारक्षक कुठे होते? असा सवाल विचारला जात आहे. रुग्णालय व्यवस्थापन संबंधित नातेवाईकांकडून स्पष्टीकरण मागवणार असून, कर्तव्यात कसुरी करणाऱ्या कर्मचाऱ्यांवरही कारवाई होण्याची शक्यता आहे. अशा घटनांची पुनरावृत्ती टाळण्यासाठी रुग्णालयातील सुरक्षा यंत्रणा अधिक कडक करण्याच्या सूचना देण्यात आल्या आहेत.

नागरिकांचा संताप

सोशल मीडियावर या व्हिडिओवर संमिश्र प्रतिक्रिया उमटत आहेत. काही जण याला श्रद्धेचा भाग मानत असले, तरी बहुतांश नागरिकांनी सार्वजनिक आरोग्य व्यवस्थेत आणि विशेषतः आयसीयूमध्ये अशा कृत्यांचे समर्थन करणे चुकीचे असल्याचे म्हटले आहे. "रुग्णालय हे उपचारांचे ठिकाण आहे, तिथे वैद्यकीय शिस्त पाळलीच पाहिजे. प्रशासनाने याकडे दुर्लक्ष करू नये," अशी मागणी सामान्य नागरिकांकडून केली जात आहे. आता या प्रकरणात दोषींवर काय कारवाई होते, याकडे सर्वांचे लक्ष लागले आहे.