मुंबई : महाराष्ट्राच्या अनेक भागांमध्ये नागरिक असह्य उकाड्याने हैराण आहेत, त्याचवेळी राज्याच्या काही भागांमध्ये अवकाळी आणि गारपिटीमुळे शेतकरी त्रस्त आहेत. राज्याच्या वेगवेगळ्या भागांमध्ये असे वेगवेगळे वातावरण आहे. या वातावरणात मुंबईच्या कुलाबा भागात ना सोसाट्याचा वारा सुटला, ना पाऊस पडला पण झाडाची फांदी तुटून एकाचा मृत्यू झाला आणि काही जण जखमी झाले. जखमींवर रुग्णालयात उपचार सुरू आहेत.
मुंबईतील कुलाबा परिसरात पोलीस महासंचालक कार्यालयासमोर एका झाडाची फांदी तुटून एकाचा मृत्यू झाला आणि काही जण जखमी झाले. गुलमोहराच्या झाडाची मोठी फांदी अचानक तुटून पडली. जेव्हा ही घटना घडली त्यावेळी त्या भागातून जात असलेल्या वाहनांवर फांदी पडली. एकूण चार वाहनं ही फांदीखाली सापडली. या दुर्घटनेत काही जण जखमी झाले. जखमींना तातडीने सेंट जॉर्ज रुग्णालयात उपचारांसाठी दाखल करण्यात आले. उपचार सुरू असताना अनिल भगोजी मोरे या ४५ वर्षीय व्यक्तीचा मृत्यू झाला. इतर जखमींवर रुग्णालयात उपचार सुरू आहेत.
झाडाची फांदी कोसळून सार्वजनिक बांधकाम विभागाच्या इलेक्ट्रिशियनचा मृत्यू : मुंबईच्या कुलाबा भागात गुलमोहराच्या झाडाची मोठी फांदी अंगावर पडल्यामुळे अनिल भगोजी मोरे या ४५ वर्षीय व्यक्तीचा मृत्यू झाला. अनिल भगोजी मोरे हे सार्वजनिक बांधकाम विभागात इलेक्ट्रिशियन म्हणून कार्यरत होते. ते त्यांची कुलाबा येथील पोलीस मुख्यालय आणि जवळच्या आमदार निवासात ड्युटी होती. तिथल्याच एका कूलरचे काम करून परत असताना फांदी अंगावर पडल्यामुळे त्यांचा मृत्यू झाला.
मदतकार्य : झाडाची फांदी हटवून रस्ता मोकळा करण्यात आला. यानंतर वाहतूक पूर्वत सुरू झाली आहे. मुंबई अग्निशमन दल आणि महापालिका कर्मचारी यांनी पोलिसांच्या सहकार्याने तातडीने मदतकार्य केले. यामुळे लवकरच परिस्थिती नियंत्रणात आली आहे. सोसाट्याचा वारा आणि पाऊसही पडत नव्हता, अशावेळी अचानक फांदी तुटण्याचे कारण समजलेले नाही. नियमानुसार दुर्घटनेची चौकशी सुरू आहे.
