अकोला : 'सद्रक्षणाय खलनिग्रहणाय' हे महाराष्ट्राच्या पोलिसांचे ब्रीदवाक्य, ज्याचा आदर संपूर्ण महाराष्ट्राला आहे. पण हेच रक्षक आता भक्षक बनले आहेत, असं म्हटलं तरी त्यात काही चुकीचं ठरणार नाही. कारण अकोल्यात घडलेल्या संतापजनक प्रकाराने पोलीस खरंच आपले रक्षणकर्ता आहेत की नाही? हा प्रश्न उपस्थित होतो आहे. जी वर्दी संपूर्ण महाराष्ट्रातील स्त्रियांचं रक्षण करण्यासाठी कायम सक्षम आणि पुढे असते, त्याच वर्दीला अकोल्यातील प्रकाराने काळे डाग लागले आहेत.
नेमकं घडलं काय?
एका महिलेला ८० लाख रुपयांच्या फसवणुकीच्या आरोपाखाली अटक करण्यात आली होती. सायबर पोलिसांनी बेड्या ठोकल्यानंतर न्यायालयाने तिला पोलीस कोठडी सुनावली. अकोल्यातील सिव्हिल लाईन पोलीस ठाण्याच्या कोठडीत ही महिला कैद आहे. तिथेच आपलं कर्तव्य बजावत असलेल्या राजेश जाधव यांनी मर्यादेचे उल्लंघन करत संबंधित महिलेकडे शरीर सुखाची मागणी केली. तू खूप सुंदर दिसतेस, तुझी मुलगीही अगदी तुझ्यासारखी सुंदर आहे. तिला माझ्याकडे पाठव त्या बदल्यात मी तुला १०,००० देतो, असे सांगितले. एका पोलिसाची ही मागणी ऐकताच महिलेला धक्का बसला, महिलेने घाबरून न जात हा सर्व प्रकार उपस्थित असलेल्या एका महिला पोलीस कर्मचाऱ्याला सांगितला.
महिला कर्मचारी आली मदतीला
पोलीस महिला कर्मचारी हिने तात्काळ हा प्रसंग वरिष्ठ पोलीस अधिकाऱ्यांना कळवला. वरिष्ठ अधिकाऱ्यांनी पोलीस ठाण्यात येताच संताप व्यक्त करत , वर्दीची लाज राखा असे कडक शब्दात सुनावले आणि आरोपी पोलीस उपनिरीक्षक राजेश जाधव यावर तात्काळ निलंबनाची कारवाई केली. या घटनेचा व्हिडिओ सोशल मीडियावर व्हायरल झाला असून राज्यभरातून तीव्र संताप व्यक्त होत आहेत.
पीडित महिलेच्या फिर्यादीवरून राजेश जाधव विरोधात गुन्हा दाखल करण्यात आला असून, त्याला तातडीने निलंबित करण्यात आले आहे. सुदर्शन पाटील (SDPO, अकोला) यांनी या प्रकरणाला गांभीर्याने घेत कडक कारवाईचे संकेत दिले आहेत.
घटनेचा व्हिडिओ व्हायरल झाला, आणि संपूर्ण महाराष्ट्र भरातून पोलीस अधिकाऱ्यावर कडक शिक्षेची मागणी करण्यात आली आहे. तसेच सामाजिक क्षेत्रातून या घटनेचा निषेध व्यक्त होत आहे.
