- जैश-ए-मोहम्मदचा कणा ढासळला?
मुंबई : पाकिस्तानस्थित दहशतवादी संघटना जैश-ए-मोहम्मदचा प्रमुख चेहरा मसूद अझर याचा मोठा भाऊ ताहिर अन्वर याच्या आकस्मिक मृत्यूने दहशतवादी वर्तुळात मोठी खळबळ उडाली आहे. या मृत्यूमागील कारण अद्याप स्पष्ट नसल्याने गूढ अधिकच वाढले आहे.
अहवालांनुसार, ताहिर अन्वर हा केवळ एक सदस्य नव्हता, तर ‘जैश’च्या अनेक मोठ्या कारवायांच्या पडद्यामागील मुख्य सूत्रधार होता. तो मसूद अझरचा विश्वासू सल्लागार आणि संपर्क अधिकारी म्हणून काम करत होता. संघटनेच्या दहशतवादी योजना तयार करणे, त्यांची अंमलबजावणी आणि समन्वय साधणे ही महत्त्वाची जबाबदारी त्याच्यावर होती.
११ भावंडांमध्ये सर्वात मोठा असलेला ताहिर सुरुवातीला पाकिस्तानात कुक्कुटपालन व्यवसाय करत होता. मात्र २००० नंतर त्याने दहशतवादाच्या मार्गावर पाऊल ठेवले. त्याच वर्षी त्याने आपल्या धाकट्या भावासोबत जैश-ए-मोहम्मदची स्थापना केली आणि संघटनेच्या लष्करी कारवायांचे नेतृत्व केले.
भरती, प्रशिक्षण आणि नवीन दहशतवादी शिबिरांची उभारणी या सर्व गोष्टींमध्ये ताहिरची महत्त्वाची भूमिका होती. मात्र, तो नेहमीच पडद्यामागे राहिला. मसूद अझर जिथे आघाडीवर दिसत होता, तिथे ताहिर शांतपणे संपूर्ण यंत्रणा सांभाळत होता. संघटनेच्या मुख्यालयातूनच तो या कारवाया नियंत्रित करत असे.
मसूद अझर स्वतः ताहिरला संघटनेचा ‘कणा’ मानत होता. त्यामुळेच त्याच्या मृत्यूने ‘जैश’ची ताकद कमी होण्याची शक्यता व्यक्त केली जात आहे. इतकेच नव्हे, तर संघटनेत नेतृत्वासाठी अंतर्गत संघर्ष निर्माण होण्याची शक्यता देखील वर्तवली जात आहे.
BREAKING: Pakistani Terror Organisation Jaish-e-Mohammed chief Masood Azhar's elder brother Mohammad Tahir Anwar dies under "suspicious circumstances" The mas was responsible for hundreds of death.#Pakistan #Terrorism #India #AsimMunir #Iran https://t.co/2j1bxYJvoo pic.twitter.com/AzpR0X4t5L
— WWIII Monitor ⚠️ (@crichasee) March 30, 2026
विशेष म्हणजे, काही अहवालांनुसार ऑपरेशन सिंदूरनंतर ताहिरच्या उपस्थितीत संघटनेच्या मुख्यालयातून ‘जमात-उन-मोमिनात’ या महिला दहशतवादी शाखेची स्थापना करण्यात आली होती. या शाखेच्या प्रशिक्षणामध्येही ताहिरची मोठी भूमिका होती.
एकूणच, ताहिर अन्वरच्या मृत्यूमुळे जैश-ए-मोहम्मदसमोर मोठे नेतृत्व संकट उभे राहण्याची शक्यता असून, पुढील काळात या संघटनेतील घडामोडींवर सर्वांचे लक्ष लागले आहे.
