- ५ वर्षांचे संपूर्ण वेतन महापौर निधीसाठी
मुंबई : जनहितासाठी एक प्रेरणादायी पाऊल उचलत नगरसेवक तेजिंदर सिंग तिवाना यांनी आपल्या संपूर्ण वेतन आणि भत्ते जनसेवेसाठी समर्पित करण्याचा मोठा निर्णय घेतला आहे. त्यांच्या या निर्णयामुळे राजकीय वर्तुळात आणि सर्वसामान्यांमध्ये कौतुकाची लाट उसळली आहे.
नुकत्याच पार पडलेल्या महानगरपालिका निवडणुकीत वॉर्ड ४७ मधून विजयी झालेल्या तिवाना यांनी आपल्या पुढील पाच वर्षांच्या कार्यकाळातील संपूर्ण मानधन तसेच विविध समिती बैठकींसाठी मिळणारे सर्व भत्ते महापौर निधी मध्ये जमा करण्याचा निर्णय घेतला आहे. यासंदर्भात त्यांनी महापौरांकडे अधिकृत निवेदनही सादर केले आहे.
यावेळी बोलताना तिवाना म्हणाले, “नगरसेवक म्हणजे केवळ पद नाही, तर ती जबाबदारी आहे. जनतेची सेवा निस्वार्थ भावनेने व्हायला हवी. समाजातील शेवटच्या घटकापर्यंत मदत पोहोचवणे हेच माझे पहिले कर्तव्य आहे. याच भावनेतून मी माझे संपूर्ण वेतन आणि भत्ते जनकल्याणासाठी देण्याचा निर्णय घेतला आहे.”
तिवाना यांनी व्यक्त केलेला विश्वास असा की, ही रक्कम गरजू मुंबईकरांच्या मदतीसाठी आणि विविध जनकल्याणकारी योजनांच्या अंमलबजावणीसाठी महत्त्वाची ठरेल.
दरम्यान, भारतीय जनता पक्ष यंदाच्या महापालिका निवडणुकांमध्ये युवा उमेदवारांना संधी देत नव्या विचारसरणीला चालना देण्याचा प्रयत्न करत आहे. मुंबईच्या विकासाला नवी दिशा देण्याच्या दृष्टीने तिवाना यांचा हा निर्णय महत्त्वाचा मानला जात आहे.
एकूणच, तेजिंदर सिंग तिवाना यांची ही पुढाकार केवळ त्यांच्या जनसेवेतील निष्ठेचे प्रतीक नसून, इतर जनप्रतिनिधींनाही प्रेरणा देणारे उदाहरण ठरत आहे.
