पुणे : ऐन उन्हाळयात भर दुपारी पावसाने पुण्यात हजेरी लावली. मुसळधार पाऊस, सोसाट्याचा पाऊस आणि गारपिटीने पुणेकरांना चांगलेच झोडपून काढले आहे. पुण्यातील आयटी पार्कमध्ये तर चक्क बर्फ साचला.
महाराष्ट्र हवामान विभागाने राज्यात काही दिवस पावसाचे संकेत दिले आहेत. त्यामुळे नागरिकांना हवामान बदलाचा त्रास हा सहन करावा लागणार आहे. पुणे जिल्ह्यातही काही ठिकाणी अशीच परिस्थिती निर्माण झाली. दुपारी अचानक वातावरणात बदल झाला, ढग दाटून आले, सोसाट्याचा वर सुरु झाला, आणि मुसळधार पावसाला सुरुवात झाली. या कोसळधार सोबत काही ठिकाणी गारपिटही पडली.
पुण्यातील हा पावसाचे अनेक व्हिडीओ सध्या व्हायरल होत आहेत. गारपीट , मुसळधार पाऊस, जोरदार वारे यामुळे पुणेकरांची त्रेधातिरपीट उडाली आहे. पावसामुळे काही ठिकाणी प्रचंड पाणी साचले, पुण्यातील हिंजवडी या आयटी पार्कमध्ये इतकी गारपीट झाली की पुणे नसून कुठल तरी थंड प्रदेशातील ठिकाण आहे असे भासत आहे. पुण्याच्या आयटी पार्कचा तो व्हायरल होणारा व्हिडीओ पाहून अनेकांना आश्चर्याचा धक्का बसला आहे.
पुण्यात नेमका कुठे-कुठे पाऊस पडला?
पुण्यात आज (३० मार्च २०२६) दुपारी पुणे शहर, पिंपरी-चिंचवड आणि भोर तालुक्यात अचानक पावसाने हजेरी लावली. बाणेर, बालेवाडी, औंध, कोथरूड आणि सिंहगड रोड परिसरात सोसाट्याच्या वाऱ्यासह मुसळधार पाऊस पडला, तर काही ठिकाणी गारपीटही झाली.
पावसाच्या पार्श्वभूमीवर प्रशासनाकडून नागरिकांना आवश्यक ती सर्व खबरदारी घेण्याचे आवाहन करण्यात आले आहे. विशेष म्हणजे पुढील काही तास शहर आणि परिसरात ढगाळ वातावरण राहण्याची शक्यता आहे.
