मुंबई : आयपीएल २०२६ मोहीम सुरू होण्यापूर्वीच चेन्नई सुपर किंग्सच्या (CSK) अडचणी वाढत आहेत. माजी कर्णधार महेंद्रसिंग धोनी (MS Dhoni) दुखापतीमुळे दोन आठवड्यांसाठी संघाबाहेर गेल्यानंतर, आता त्यांना आणखी एक धक्का बसला आहे. स्फोटक फलंदाज डेवाल्ड ब्रेविस (Dewald Brewis) देखील दुखापतग्रस्त झाला आहे. तो दोन ते तीन सामन्यांसाठी संघाबाहेर राहू शकतो. चेन्नई या हंगामातील आपला पहिला सामना ३० मार्च रोजी राजस्थान रॉयल्सविरुद्ध खेणार आहे.
चेन्नईने यापूर्वीच ऑस्ट्रेलियन वेगवान गोलंदाज नॅथन एलिसला गमावले आहे, जो दुखापतीमुळे संपूर्ण हंगामासाठी संघाबाहेर गेला आहे. ब्रेविस हा दुखापतग्रस्त होणारा तिसरा क्रिकेटपटू आहे. त्याला बरगडीला ताण आल्याची माहिती आहे. तो मधल्या फळीत खेळतो आणि चौथ्या क्रमांकावर फलंदाजी करतो. चेन्नईने त्याला आयपीएल २०२५ दरम्यान दुखापतीमुळे बदली क्रिकेटपटू म्हणून करारबद्ध केले होते. गेल्या हंगामातील संघाच्या खराब कामगिरीनंतर आणि त्याच्या फलंदाजीच्या शैलीवर प्रश्नचिन्ह निर्माण झाल्यानंतर ब्रेविसला संघात घेण्यात आले होते. हा निर्णय प्रभावी ठरला.
ब्रेविसच्या (Dewald Brewis) अनुपस्थितीमुळे सीएसकेला मॅथ्यू शॉर्टला मधल्या फळीत खेळवावे लागू शकते. दुखापतीतून सावरल्यानंतर हा ऑस्ट्रेलियन अष्टपैलू क्रिकेटपटू संघात परतला आहे. तो वरच्या फळीत फलंदाजी करतो, पण सीएसकेकडे त्याच्यासाठी मधल्या फळीत जागा आहे. तो ऑफ-स्पिन गोलंदाजीही करू शकतो. सरफराज खान, कार्तिक शर्मा, उर्विल पटेल आणि अमन खान हे देखील पर्याय आहेत.
