आनंदी पालकत्व : डाॅ. स्वाती गानू
आपलं सौंदर्य खुलवण्यासाठी आपण चांगले कपडे घालतो. स्त्रिया आकर्षक अलंकार घालतात, पण सौंदर्याचा खरा परिमाण काय ठाऊक आहे, तर ते आहे तुमच्या चेहऱ्यावरचे दिलखुलास हास्य. तुमचा हसरा चेहरा मुलांना एक प्रकारची सकारात्मकता देतो. माणसाचा चेहरा सगळ्यात सुंदर केव्हा दिसतो, तर त्या चेहऱ्यावरती जेव्हा असतं हास्य. त्या हास्याच्या प्रकाशाने तो आपल्या अवतीभवतीचे वातावरणही आनंदित करून टाकतो. पालकांनो तुमची मुलं समाधानी आणि आनंदी दिसावी असं तुम्हाला वाटत असतंच मात्र कधी-कधी आपल्या सगळ्यांच्याच आयुष्यात ताण-तणाव भरपूर असतो, पण लहान मुलं, किंबहुना आपली मुलं ही स्ट्रेसबस्टर असतात असं म्हणतात. त्यामुळे घरातून बाहेर पडताना आपण जर त्यांना एक स्मितहास्य जरी दिलं तरी त्यांचा पूर्ण दिवस कसा सुगंधित होऊन जातो. असं म्हणतात की या जगामध्ये कोणाचंही स्वागत करायचं असेल, तर तुमचं एक हास्य पुरेसं असतं. हास्य हे तुमच्या व्यक्तिमत्त्वाला पूर्णत्व देतं. तुमचं हास्य मुलांच्या डोळ्यांत आश्वासकतेचं दीप उजळवून टाकतं.
हास्याची रेषा वक्र असली तरी हास्याने आयुष्य सुरळीत होऊन जातं. मुलं आणि पालक यांच्यातील अंतर हास्याने कमी होतं. मुलांच्या हृदयाचे दरवाजे उघडतात पालकांनो तुमच्या एका हास्याने. म्हणूनच मूल घरातून बाहेर पडण्यापूर्वी त्याच्याकडे हसून पाहिलंत, तर तुमच्या दोघांचाही दिवस खूप आनंदात जातो.
कधी तुम्ही विचार केला आहे का, की एक छोटंसं हसू आपल्या आयुष्यात किती मोठा बदल घडवू शकतं? मुलांकडे पाहून हसणे आई-वडील आणि मुलांसाठी खूप महत्त्वाचे आहे. हास्य हे मुलांसाठी खूप चांगले असते. तसं पाहिलं तर हसणे हा एक साधा भाव आहे, पण त्याचे फायदे खूप मोठे असतात. मुले, आई-वडील आणि त्यांची काळजी घेणारे लोक जर रोजच्या आयुष्यात मुलांकडे पाहून हसले, तर त्याचा निश्चितच चांगला परिणाम होतो. हसल्यामुळे तुमच्या दोघांचेही मन आनंदी आणि हलके होते.
पालकहो तुमच्या चेहऱ्यावरचे हसू काय करू शकते ते समजून घेऊ :
१. मन आनंदी होते :
हसल्यामुळे मन हलके आणि आनंदी वाटते. मुलांना अजून त्यांच्या भावना सांभाळायला शिकायचे असते. तेव्हा हसल्यामुळे त्यांना राग, दुःख किंवा निराशा कमी वाटू शकते. आई-वडीलही काम आणि घरच्या जबाबदाऱ्यांमुळे ताणात असतात. अशा वेळी हसल्यामुळे त्यांना थोडा आराम मिळतो आणि ताण कमी होतो.
२. नातेसंबंध मजबूत होतात : आई-वडील जेव्हा मुलांकडे पाहून हसतात तेव्हा मुलांना प्रेम, आपुलकी आणि आधार वाटतो. मुलेही परत हसली तर त्यांचा आत्मविश्वास वाढतो. यामुळे कुटुंबात प्रेमळ आणि सुरक्षित वातावरण तयार होते.
३. इतरांशी चांगले संबंध बनतात :
मुलं इतरांशी हसून बोलायला शिकली, तर त्यांना मित्र बनवणे सोपे जाते. हसणारी मुले बाकीच्या मित्रांना अधिक मैत्रीपूर्ण आणि जवळची वाटतात. आई-वडीलही हसून लोकांशी बोलले, तर नवीन ओळखी आणि संधी मिळू शकतात. हे जेव्हा मुलं पाहतात तेव्हा त्यांना हे समजते की दोस्ती करताना हास्याचा उपयोग चांगल्या पद्धतीने होऊ शकतो.
४. आरोग्य चांगले राहते :
अभ्यासानुसार हसल्यामुळे ताण कमी होतो, रक्तदाब कमी राहू शकतो आणि शरीराची रोगप्रतिकारक शक्ती वाढू शकते. हसल्यामुळे आई-वडील आणि मुले दोघांचेही शारीरिक आणि मानसिक आरोग्य चांगले राहते.
५. चांगल्या सवयी वाढतात :
हसणे अनेकदा दुसऱ्यांनाही हसायला प्रेरित करते. घरात सगळे जास्त हसले तर घरातील वातावरण अधिक आनंदी आणि सकारात्मक बनते. आई-वडील हसतमुख राहिले, तर मुलेही सकारात्मक विचार करायला शिकतात आणि अडचणींना चांगल्या पद्धतीने सामोरे जातात. म्हणून रोजच्या आयुष्यात जास्त हसा. मुलं हसून बोलायला शिकली, तर त्यांना मित्र बनवणं सोपं जातं. हसणारी मुलं जास्त मैत्रीपूर्ण आणि जवळची वाटतात. आणखी एक खास गोष्ट म्हणजे हसणे संसर्गासारखे पसरते. एखादी व्यक्ती हसली, की आजूबाजूचे लोकही हसायला लागतात. घरात सगळे जास्त हसले, तर घरचे वातावरण अधिक आनंदी, सकारात्मक आणि प्रेमळ बनते. म्हणूनच, आपल्या रोजच्या आयुष्यात जास्तीत जास्त हसण्याचा प्रयत्न करा.
कधी-कधी एक छोटंसं हसू एखाद्याचा संपूर्ण दिवस सुंदर बनवू शकतं. तुमच्या हास्याने मुलांच्या चेहऱ्यावर जणू काही प्राजक्ताच्या फुलांसारखा आनंद पसरेल. उत्साह, आनंद, समाधानाने त्यांचे मन भरून जाईल. हसल्याने आपल्या आजूबाजूचे वातावरण आनंदित होते हे त्यांना समजते आणि वातावरणामध्ये एक प्रकारची सकारात्मकता निर्माण करण्यात ते यशस्वी होतात, पण हे सगळं ते तुमच्याकडूनच शिकणार आहेत, म्हणून मूल घरातून बाहेर पडत असताना एक हास्य किती मोठी किमया करून दाखवू शकते हे मुलांच्या चेहऱ्याकडे बघून तुम्हाला कळेल. हसरी आणि आनंदी मुले सगळ्यांनाच खूप आवडतात कारण त्यांच्या यशामध्ये या हास्याचा मोठा वाटा असतो. म्हणून पुढच्या वेळी तुम्हाला ताण वाटला, तर एकदा हसून बघा. कदाचित तेच तुमचा दिवस उजळवेल.
