मुंबई : मराठी सिनेविश्वातील प्रसिद्ध अभिनेत्री राजश्री देशपांडे सेक्रेड गेम्स,मँटो आणि ब्लॅक वॉरंट यांसारख्या सिनेमामध्ये झळकली आहे. आपल्या दमदार अभियनानं राजश्रीनं प्रेक्षकांची मने जिंकली. नुकताच या अभिनेत्रीनं सोशल मिडियावर एक पोस्ट करत तिच्या आयुष्यातील सर्वात कठीण टप्प्याबद्दल खुलासा केला असून तिने स्तनाच्या कर्करोगावरील शस्त्रक्रियेचा अनुभव चाहत्यांसोबत शेअर केला आहे.
या पोस्टमध्ये राजश्रीने सांगितले की जेव्हा तिला पहिल्यांदा कर्करोगाचं निदान झाल्याचे समजले, तेव्हा ती रुग्णालयात एकटीच होती. त्या क्षणी ती मानसिकदृष्ट्या कोलमडून गेली होती. राजश्रीनं लिहिलयं की, तिला जेव्हा या आजाराचे निदान झाले तेव्हा ती पूर्णपणे खचून गेली होती. ती एकटी बसून रडण्याचा तो क्षण तिला आजही आठवतो. त्यावेळी तिच्या मनात अनेक प्रश्न होते, पण त्यापैकी एकाही प्रश्नाचं स्पष्ट उत्तर तिच्याकडे नव्हतं.
या पोस्टमध्ये पुढे राजश्री म्हणाली असे काही दिवस असतात जेव्हा माझ्यात ताकद नसावी असं वाटतं. मला फक्त शांत राहायचं असतं. मेरी ऑलिव्हरचा कवितेतल्या त्या चिमण्यासारखं, ज्या माझ्या खिडकीतल्या बोगनव्हिलियावर बसून माझ्यासोबत सूर्योद्याकडे बघत बसतात. पण आज मी ते करून दाखवलं. मी स्वत:साठी एक स्माईल आणि एक मिठी मिळवली आणि त्या सर्व लोकांचा विचार केला जे प्रवासात माझ्यासोबत आहेत, ज्यांनी फोन केला, मेसेज केले आणि मला खूप प्रेम दिलं. मला माहित आहे की उद्या मी लढण्यासाठी आणखी तयारी करत असेन, पण आजचा दिवस प्रेमाचा असू दे. असं तिने आपल्या पोस्टमध्ये म्हटलं आहे.
View this post on Instagram
अभिनेत्री राजश्री देशपांडेला ग्रेड १ स्तनाच्या कर्करोगाचं निदान झालं होतं. वेळेत उपचार घेतल्यामुळे तिने शस्त्रक्रिया करून घेतली. आता ती हळूहळू बरी होत असून तिने शेअर केलेल्या या तिच्या या अनुभवामुळे अनेक महिलांना प्रेरणा मिळणार आहे.
