नेपाळमध्ये मोठी राजकीय घडामोड घडली असून माजी पंतप्रधान केपी शर्मा ओली यांना पोलिसांनी अटक केली आहे. भक्तपूरमधील गुंडू येथील त्यांच्या निवासस्थानातून पोलिसांनी त्यांना अटक केली आहे. ‘झेन-जी’ आंदोलनादरम्यान झालेल्या मृत्यू प्रकरणी ही कारवाई करण्यात आल्याचे वृत्त आहे.
या प्रकरणात नेपाळचे माजी गृहमंत्री रमेश लेखक यांनाही अटक करण्यात आली आहे. नव्याने सत्तेवर आलेल्या पंतप्रधान बालेन शाह (Balen Shah) यांच्या नेतृत्वाखालील सरकारने ही मोठी कारवाई करत कठोर संदेश दिला आहे.
शुक्रवारी (२७ मार्च) ३५ वर्षीय बालेन शाह यांनी पंतप्रधानपदाची शपथ घेतली. रॅपर ते महापौर आणि आता देशाचे पंतप्रधान असा त्यांचा प्रवास असून ते नेपाळच्या इतिहासातील सर्वात तरुण पंतप्रधान ठरले आहेत. शपथविधीनंतर लगेचच झालेल्या या अटकेमुळे देशात मोठी राजकीय खळबळ उडाली आहे.
सप्टेंबर २०२५ मध्ये नेपाळमध्ये ‘झेन-जी’ आंदोलन उसळले होते. या आंदोलनादरम्यान हिंसाचार भडकला आणि अवघ्या दोन दिवसांत ७० हून अधिक लोकांचा मृत्यू झाला. त्या वेळी सत्तेवर असलेल्या ओली सरकारवर या प्रकरणात जबाबदारी निश्चित करण्याची मागणी होत होती. आता याच प्रकरणी त्यांना अटक करण्यात आली आहे.
दोषी ठरल्यास ओली यांना १० वर्षांपर्यंत कारावासाची शिक्षा होऊ शकते. नेपाळच्या राजकारणातील प्रभावी नेते म्हणून ओळख असलेल्या ओली यांनी यापूर्वी गृहमंत्री, उपपंतप्रधान आणि परराष्ट्र मंत्री अशी महत्त्वाची पदे भूषवली आहेत.
२०२६ मधील निवडणुकांच्या पार्श्वभूमीवर ही कारवाई राजकीयदृष्ट्या महत्त्वाची मानली जात असून पुढील काळात नेपाळच्या राजकारणात मोठे बदल होण्याची शक्यता व्यक्त केली जात आहे.
