लडाख : लडाखमधील झोजी ला येथे श्रीनगर-लेह महामार्गावर झालेल्या हिमस्खलनात अनेक वाहने बर्फाखाली गाडली गेली. बर्फात गाडले गेल्यामुळे सात जणांचा मृत्यू झाला आणि अनेक जण जखमी झाले. महामार्ग बंद झाला. सोनमर्ग आणि द्रास जिल्हा प्रशासन, पोलीस, लष्कर, बॉर्डर रोड्स ऑर्गनायझेशन आणि एसडीआरएफ यांच्या सहकार्याने प्रशासनाने मदतकार्य सुरू केले आहे. यंत्रांचा आणि मनुष्यबळाचा वापर मोठ्या प्रमाणात करून बर्फ उपसण्याचे काम वेगाने सुरू आहे. केंद्रीय मंत्री जितेंद्र सिंह यांनी मदतकार्याचा आढावा घेतला तसेच मृतांना श्रद्धांजली वाहिली.
द्रासमधील झोजी ला पास येथील कॅप्टन-टर्न महामार्गावर हिमस्खलन झाले. वाहने बर्फाखाली गाडली गेली. या दुर्घटनेत तीन पुरुष, एक महिला आणि एका मुलाचा मृत्यू झाला. काही वाहने बर्फाखाली पूर्णपणे गाडली गेल्याने मृतांचा आकडा वाढण्याची शक्यता आहे, असे द्रासचे एसडीएम विशाल अत्री यांनी सांगितले. महामार्गाच्या दोन्ही बाजूंनी बचावकार्य सुरू असल्याची माहिती अत्री यांनी दिली. बचावकार्य काश्मीरमधील सोनमर्ग बाजूने आणि लडाखमधील द्रास बाजूने सुरू असल्याचे ते म्हणाले. महामार्गाचा मोठा भाग हिमस्खलनामुळे प्रभावित झाला. अद्याप किमान १५ वाहने बर्फाखाली पूर्णपणे गाडली गेली असल्याचेही त्यांनी सांगितले.
बर्फ हटविणारी यंत्र, पोलीस, एसडीआरएफ, बीआरओ आणि लष्कराच्या रुग्णवाहिका मदतकार्यात गुंतल्या आहेत. सध्या १०० जणांचे मनुष्यबळ मदतकार्यात गुंतले असल्याचे द्रासचे एसडीएम विशाल अत्री म्हणाले. मेघा टनेलच्या कर्मचाऱ्यांचीही मदत घेत असल्याचे त्यांनी सांगितले.
हिमस्खलन झोजिलाच्या 'झिरो पॉइंट'जवळ झाले. या उंच भागातून जाणारी बर्फाखाली गाडली गेली. ही घटना अचानक आणि वेगाने घडली. अनेकांना सावरण्याची संधीच मिळाली नाही, असे अत्री म्हणाले.
श्रीनगर-लेह महामार्ग
श्रीनगर-लेह महामार्ग हा एनएच-१ म्हणून ओळखला जाणारा ४३४ किलोमीटरचा एक महत्त्वाचा मार्ग आहे, जो श्रीनगर आणि लेह यांना जोडणारा मुख्य दुवा आहे. हा ११,५७५ फूट उंचीवरील झोजिला खिंडीतून जाणारा रस्ता त्याच्या भोवतालच्या निसर्गरम्य दृश्यांसाठी आणि उंचीवरील आव्हानांसाठी प्रसिद्ध आहे.
