मुंबई: मालमत्ता कराच्या थकबाकी वसुलीसाठी अतिरिक्त आयुक्त डॉ अश्विनी जोशी यांनी चाबूक हाती घेताच याच्या महसूल वाढीला आता गती येत आहे. त्या माध्यमातून महानगरपालिकेने अटकावणी व जप्तीची कारवाई अधिक तीव्र करण्याच्या अनुषंगाने कर निर्धारण व संकलन विभाग तसेच जी दक्षिण विभागाच्या संयुक्त विद्यमाने कमला मिल परिसरातील रमेश घमंडीराम गोवानी व गौरव इन्व्हेस्टमेंट यांच्या मालकीच्या सात गाळ्यांसह कार्यालय, वाहनतळ, इंटरनेट सेंटर, टाटा पॉवर उप केंद्रावर गुरुवारी २६ मार्च २०२६ रोजी जप्तीची कारवाई केली. यासोबतच संबंधित मालमत्तांचा पाणीपुरवठाही खंडित करण्यात आला आहे. कमला मिलमधील या कंपन्यांविरोधात जाण्याची हिंमत कोणत्याही महापालिकेच्या अधिकाऱ्यांनी दाखवली नव्हती, ही हिंमत आता डॉ अश्विनी जोशी यांनी दाखवत अशक्यही गोष्ट शक्य करून दाखवली आहे.
अतिरिक्त आयुक्त (शहर) डॉ. अश्विनी जोशी यांचे मार्गदर्शन आणि सहआयुक्त ( कर निर्धारण व संकलन) विश्वास शंकरवार, सहायक आयुक्त ( कर निर्धारण व संकलन) गजानन बेल्लाळे यांच्या नेतृत्वाखाली ही कारवाई करण्यात आली आहे. सन २०२५ - २६ या आर्थिक वर्षाचा तसेच थकीत मालमत्ता कर ३१ मार्च २०२६ पूर्वी न जमा केल्यास संबंधित मालमत्ताधारकांविरोधात दंडात्मक कारवाई करण्यात येत आहे. तसेच, थकीत करभरणा न करणाऱ्या मालमत्तांवर अटकावणी आणि जप्तीची कारवाई करण्यात येत आहे.
कमला मिल परिसरातील रमेश गोवानी व मेसर्स गौरव इन्व्हेस्टमेंट यांच्याकडे मालमत्ता करापोटी १४ कोटी २२ लाख रूपयांची थकबाकी आहे. तसेच, ६७ लाख २५ हजार ७३१ रूपयांचीही थकबाकी आहे. दिलेलया मुदतीत मालमत्ता कर भरणा न केल्यामुळे टाटा पॉवर उपकेंद्र, इंटरनेट सेंटर, मोकळे वाहनतळासह सात गाळे आणि गोवानी यांच्या मालकीच्या कार्यालयावर गुरुवारी जप्तीची कारवाई करण्यात आली. यासोबतच संबंधित मालमत्तांचा पाणीपुरवठाही खंडित करण्यात आला आहे.
अतिरिक्त आयुक्त (शहर) डॉ. अश्विनी जोशी म्हणाल्या की, मालमत्ताधारकांनी ३१ मार्च २०२६ पर्यंत कर भरणा करणे अपेक्षित आहे. त्यामुळे, थकबाकी असलेल्या सर्व मालमत्ताधारकांनी तसेच चालू आर्थिक वर्षाचा करभरणा न केलेल्या मालमत्ताधारकांनी ३१ मार्च २०२६ पूर्वी करभरणा करून दंडात्मक कारवाई टाळावी. मालमत्ताधारकांना विहित वेळेत मालमत्ता करभरणा करता यावा, यासाठी सार्वजनिक सुटी व साप्ताहिक सुटीच्या दिवशी म्हणजे २६, २८ व २९ मार्च २०२६ रोजी सकाळी ८ ते रात्री १० वाजेपर्यंत तसेच ३० आणि ३१ मार्च २०२६ रोजी सकाळी ८ ते रात्री १२ वाजेपर्यंत नागरी सुविधा केंद्र (सीएफसी) सुरू ठेवण्यात आली आहेत, असेही डॉ. अश्विनी जोशी यांनी सांगितले.
