मुंबई : रणवीरच्या धुरंधर २ सिनेमानं रिलीजच्या पहिल्याच दिवसापासून जगभरात सर्वांना वेड लावलं आहे. आदित्य धर दिग्दर्शित धुरंधर २ सिनेमानं बॉक्स ऑफिसवर धुमाकूळ घातला असून हा सिनेमा रिलीज होऊन तब्बल आठ दिवस झाल्यानंतरही धुरंधर २चा बॉक्स ऑफिसवर दबदबा कायम आहे. अवघ्या आठवडाभरातच या सिनेमानं १००० कोटी रुपयांहून अधिक कमाई केली आहे. इतक्या कमी कालावधीत एवढी कमाई करणारा हा बॉलिवूडचा पहिलाच सिनेमा ठरला आहे.
प्रदर्शनाच्या सातव्या दिवशी या सिनेमानं भारतात ४७.७ कोटी रुपये कमावले. सॅकनिल्कच्या आकडेवारीनुसार या सिनेमाचं भारतातील एकूण कलेक्शन ६२३.४२ कोटी एवढं झालं असून जगभरात या सिनेमानं १००६.५ कोटी रुपयांची कमाई करत नवा विक्रम रचला आहे.
इतर भाषांमधून किती कमाई केली ?
धुरंधर २ हा सिनेमा १९ मार्च २०२६ रोजी जगभरात प्रदर्शित झाला. प्रीमियरच्या दिवशी सिनेमानं ४३ कोटी रुपये कमावले. यानंतर सर्व पाचही भाषांमधून पहिल्या दिवशी १०२.५५ कोटी रुपयांची कमाई या सिनेमानं केली. तर, शनिवारी आणि रविवारी या सिनेमानं ११३ आणि ११४ कोटी रुपयांची कमाई केली.
रणवीर सिंहची प्रमुख भूमिका असलेल्या धुरंधर २ सिनेमात अर्जुन रामपाल, संजय दत्त, सारा अर्जुन, राकेश बेदी आणि आर माधवन यांच्या महत्त्वाच्या भूमिका आहेत. सिनेमानं अवघ्या सात दिवसांत देशभरात ६२३.४२ कोटींची कमाई केली असून यातील सर्वाधिक म्हणजेच ५८६.७२ कोटींची कमाई हिंदी आवृत्तीतून केली आहे . तर २०.५६ कोटी तेलुगुतून ९.०९ कोटी तमिळ तर ६० लाख कन्नड आवृत्तीतून या सिनेमानं कमावले आहेत.
रणवीरच्या धुरंधर २ सिनेमानं बॉक्स ऑफिसवर कमाईचा विक्रम मोडीत काढला असून आता सर्व बॉलिवूड सिनेमांचा रेकॉर्ड ब्रेक करत जगभरातील सर्वाधिक कमाई करणाऱ्या टॉप १० भारतीय सिनेमांच्या यादीत धुरंधर २ सिनेमानं आपलं नाव नोदवलं आहे.
