धारवाड: कर्नाटकच्या धारवाडजवळील एका निर्जनस्थळी जळालेल्या कारमध्ये कोळसा झालेला मृतदेह सापडल्याने हत्येचा खळबळजनक प्रकार उघडकीस आला आहे. हा मृतदेह राजू बोलाशेटी यांचा असल्याचे निष्पन्न झाले असून ते बैलहोंगळचे माजी आमदार बाबुराव बोलाशेटी यांचे पुत्र होते. बैलहोंगळमधील उडीकेरी गावचे रहिवासी असलेले राजू प्रामुख्याने शेती व्यवसायात होते आणि सोमवारपासून ते बेपत्ता होते.
कुटुंबीयांनी दिलेल्या माहितीनुसार सोमवारभर त्यांचा फोन वाजत होता पण त्यांनी तो उचलला नाही. अखेर मध्यरात्री अडीचच्या सुमारास त्यांचा फोन स्विच ऑफ झाला. सकाळी आपल्या शेतात जाणाऱ्या स्थानिक नागरिकांना जळालेली कार दिसली आणि त्यांनी तात्काळ पोलिसांना पाचारण केले. कारमधील मृतदेह पूर्णपणे जळून कोळसा झाल्यामुळे ओळख पटवणे कठीण होते. मात्र पोलिसांनी कारच्या नंबर प्लेटवरून ही गाडी राजू बोलाशेटी यांचीच असल्याची पुष्टी केली.
प्राथमिक तपासानुसार राजू यांची दुसऱ्या एखाद्या ठिकाणी हत्या करण्यात आली असावी आणि त्यानंतर त्यांचा मृतदेह त्यांच्याच कारमधून रामापूरच्या वेशीवर आणला असावा, असा संशय पोलिसांनी व्यक्त केला आहे. पुरावे नष्ट करण्याच्या उद्देशाने गुन्हेगारांनी मृतदेहासह कार पेटवून दिली असावी. पोलिसांनी घटनास्थळावरून एक शस्त्र जप्त केले असून, त्याचा सखोल तपास सुरू आहे.
स्थानिक पोलिसांसह फॉरेन्सिक तज्ज्ञ आणि ठसे तज्ज्ञांच्या पथकाने घटनास्थळाला भेट देऊन पुरावे गोळा केले आहेत. या हत्येमागचा नेमका उद्देश आणि आरोपींची ओळख अद्याप पटलेली नाही. मात्र पोलिसांनी अधिकृतपणे गुन्हा दाखल केला आहे. आरोपींचा शोध घेण्यासाठी पोलिसांनी शोधमोहीम तीव्र केली असून सर्व बाजूंनी तपास सुरू आहे.
