मुंबई (विशेष प्रतिनिधी) : बोरीवली रेल्वे स्थानकाच्या पश्चिमेला असलेल्या स्कायवॉकला आता सरकता जिना जोडला जाणार आहे. बोरीवली रेल्वे स्थानकासमोर गोरा गांधी हॉटेल समोरील स्कायवॉकला जोडण्यासाठी हा सरकता जिना बसविण्यात येणार आहे.
सध्या बोरीवली रेल्वे स्थानकाला जोडलेल्या स्कायवॉकवर मोठ्या प्रमाणात प्रवाशांची वर्दळ असते. मात्र, या ठिकाणी सरकता जिना नसल्याने विशेषतः ज्येष्ठ नागरिक, महिला आणि दिव्यांगांना अडचणींचा सामना करावा लागत आहे. ही समस्या लक्षात घेऊन महानगरपालिकेने आता या स्कायवॉकला जोडणारा सरकता जिना बसण्याचा निर्णय घेतला आहे. या कामांतर्गत सुमारे ८ मीटर उंचीचा उच्च क्षमतेचा सरकता जिना बसविण्यात येणार असून त्यावर संरक्षक छप्परही उभारण्यात येईल. गोरा गांधी हॉटेल समोरील पुलाला जोडण्यासाठी प्रवाशांच्या सोयीसाठी उच्च क्षमतेचा हा सरकता जिना उभारण्यात येणार आहे. या पुलाच्या कामासाठी विविध करांसह सव्वा तीन कोटी रुपये खर्च करण्यात येणार आहे. यासाठी कंत्राटदारांची नेमणूक करण्यात आली आहे.
सरकत्या जिन्यामुळे बोरीवली परिसरातील रेल्वे प्रवासी आणि स्थानिक नागरिकांना मोठा दिलासा मिळणार असून, सार्वजनिक वाहतुकीच्या सुविधांमध्येही लक्षणीय सुधारणा होण्याची अपेक्षा व्यक्त केली जात आहे. या स्कायवॉकला गोरागांधी हॉटेल जवळ, तसेच पोलिस स्टेशन तर इतर दोन ठिकाणी अशाप्रकारे चार ठिकाणी चढण्या आणि उतरण्यासाठी जिन्याची व्यवस्था आहे. या स्कायवॉकवरील जिन्याच्या लाद्या काही महिन्यांपूर्वी तुटल्या होत्या, त्यांची दुरुस्ती करण्यात आली होती. तसेच यावरील फेरीवाल्यांना तसेच भिकारी, गर्दुल्ले यांनाही स्थानिक आमदार संजय उपाध्याय यांनी पुढाकार घेत हटवले. त्यामुळे या स्कायवॉकवर चालताना आता विना अडथळा चालता येत आहे.