मुंबई : उद्योग क्षेत्रातील प्रमुख नाव असलेले रेमंड ग्रुपचे व्यवस्थापकीय संचालक गौतम सिंघानिया हे मालदीवमध्ये झालेल्या बोट अपघातात जखमी झाले आहेत. गुरुवारी रात्री उशिरा फेलिधू परिसरात त्यांची स्पीडबोट समुद्रात उलटल्याची घटना घडली. या अपघातानंतर त्यांना तातडीने एअरलिफ्ट करून मुंबईत आणण्यात आले असून सध्या एका खासगी रुग्णालयात त्यांच्यावर उपचार सुरू आहेत.
मिळालेल्या माहितीनुसार, बोटीत सिंघानिया यांच्या व्यतिरिक्त आणखी सात जण उपस्थित होते. यात ब्रिटन आणि रशियाची प्रत्येकी एक महिला आणि पाच पुरुष होते. अपघाताची माहिती मिळताच बचाव कार्य सुरू करण्यात आले आहे. बोटीत असलेल्यांपैकी दोन जण अद्याप बेपत्ता आहेत. बेपत्ता असलेल्यांपैकी एक भारतीय नागरिक आहे. बचावपथक बेपत्ता नागरिकांचा शोध घेत आहे.
या घटनेमुळे उद्योग क्षेत्रात आणि व्यावसायिक वर्तुळातून त्यांना लवकर बरे व्हा अशा शुभेच्छा दिल्या जात आहेत. अपघात नेमका कशामुळे झाला याबाबत अद्याप स्पष्ट माहिती समोर आलेली नाही. स्थानिक प्रशासनाकडून या प्रकरणाचा तपास सुरू असून लवकरच अपघाताच नेमकं कारण समोर येईल
गौतम सिंघानिया हे रेमंड ग्रुपचे चेअरमन आणि मॅनेजिंग डायरेक्टर आहेत. त्यांची एकूण संपत्ती ही जवळपास ११ हजार कोटी रुपयांच्या आसपास आहे. कंपनीचा व्यवसाय वस्त्रोद्योग, डेनिम, कंझ्युमर प्रॉडक्ट्स, अभियांत्रिकी आणि रिअल इस्टेट अशा विविध क्षेत्रांमध्ये विस्तारलेला आहे. तयार कपड्यांच्या क्षेत्रात रेमंडचा मोठा दबदबा असून डेनिम उत्पादनातही कंपनीचे स्थान महत्त्वाचे मानले जाते.
