मुंबई : नाशिकमधील वादग्रस्त भोंदू बाबा अशोक खरात याच्या अटकेनंतर राजकीय वर्तुळात मोठी खळबळ उडालेली असतानाच, आता शिवसेना नेते आणि माजी मंत्री दीपक केसरकर यांनी या प्रकरणावर आपली भूमिका स्पष्ट केली आहे. "अशोक खरातशी माझे संबंध जोडणे पूर्णपणे चुकीचे असून, केवळ इशानेश्वर मंदिरामुळे माझी त्याच्याशी ओळख झाली होती," असे केसरकर यांनी स्पष्ट केले आहे.
अशोक खरातवर झालेल्या गंभीर आरोपांनंतर त्याचे विविध नेत्यांसोबतचे फोटो व्हायरल झाले होते. यामध्ये दीपक केसरकर यांचाही समावेश आहे. या पार्श्वभूमीवर विरोधकांकडून होणाऱ्या टीकेला केसरकर यांनी प्रत्युत्तर दिले आहे. केसरकर म्हणाले की, "मी देवभक्त असल्यामुळे शिर्डीला जाताना सिन्नर येथील इशानेश्वर मंदिरात दर्शनासाठी जात असे. याच मंदिराच्या रस्त्याच्या मागणीसाठी खरात मुंबईत आला होता, तेव्हाचा तो फोटो आहे. तो रस्ता आता पूर्ण झाला आहे, हे कुणीही पाहू शकते. एखाद्या सार्वजनिक कामासाठी आलेल्या व्यक्तीसोबत फोटो असणे याचा अर्थ त्याच्या वैयक्तिक आयुष्यातील कृत्यांशी आमचा संबंध आहे असा होत नाही. खरातच्या मुलीच्या लग्नाला उपस्थित राहण्याबाबत स्पष्टीकरण देताना, ओळखीच्या नात्याने अशा कार्यक्रमांना हजेरी लावणे ही सामाजिक पद्धत असल्याचे त्यांनी नमूद केले.
केसरकर यांच्या काळात 'अशोक खरात शिक्षण खाते चालवत होता' असा आरोप उबाठा गटाने केला होता. यावर उत्तर देताना केसरकर म्हणाले, "अशोक खरात एकदाही माझ्या शासकीय कार्यालयात आलेला नाही. मग तो खाते कसे चालवणार? माझ्या कार्यकाळात शिक्षण विभागात जे ऐतिहासिक निर्णय झाले, तसे निर्णय यापूर्वी कधीही झाले नव्हते. माझे खाते उत्तम रितीने काम करत होते, त्यामुळे असे आरोप करणे हास्यास्पद आहे."
खरातला न्यायालय योग्य शिक्षा देईल
अशोक खरातला त्याच्या कृत्याबद्दल न्यायालय योग्य ती शिक्षा देईलच, पण केवळ ओळखीमुळे राजकीय नेत्यांचे फोटो वापरून त्यांना यात ओढणे चुकीचे आहे. त्याच्या वैयक्तिक गोष्टींबाबत मला कोणतीही माहिती नाही, असेही दीपक केसरकर यांनी सांगितले.
