- गुंतवणूकदारांसाठी दिलासादायक बातमी
मुंबई : आठवड्याच्या चौथ्या व्यापारी दिवशी म्हणजेच गुरुवार १९ मार्च रोजी, इराणशी संबंधित तणावामुळे शेअर बाजारात घसरण झाली आणि सेन्सेक्स सुमारे १८०० अंकांनी कोसळला. मात्र, सोने-चांदी खरेदी करणाऱ्यांसाठी गुरुवारीची बाजार परिस्थिती दिलासादायक ठरली आहे.
सोन्याच्या दरात ४ हजार, चांदीत १४ हजारांची घसरण :
त्यामुळे गुढीपाडव्यानिमित्त सोनं-चांदी खरेदी करणाऱ्यांसाठी मोठी संधी निर्माण झाली आहे. मुंबईत सोन्याचे दर आज १,५६,१८६ रुपये प्रति तोळा, जे काल १,६०,१९० रुपये होते. म्हणजेच, सोन्याच्या दरात ४ हजार रुपयांची घसरण झाली आहे. तर, चांदीच्या दरात जवळपास १४ हजार रुपयांची घसरण दिसली आहे. आज मुंबईत चांदीचा दर २,४३,९१३ रुपये प्रति किलो, तर काल तो २,५७,६६७ रुपये होता.
आंतरराष्ट्रीय बाजारातही घसरण :
'यूएस स्पॉट गोल्ड' १.२२% नी घसरून ४,८३६ डॉलर प्रति औंस
'स्पॉट सिल्वर' २.२५% नी घसरून ७५.७५ डॉलर प्रति औंस
देशांतर्गत वायदा बाजारात (MCX) सोन्याचा दर सुमारे १.५५ लाख रुपये प्रति १० ग्रॅम, आणि चांदीचा दर २.५० लाख रुपये प्रति किलो झाला आहे.
सोने-चांदीचे दर कसे ठरतात?
आंतरराष्ट्रीय बाजार आणि डॉलर : जागतिक बाजारात सोने-चांदीचे दर डॉलरमध्ये ठरतात. डॉलर मजबूत किंवा रुपया कमकुवत झाला, तर भारतात किमती वाढतात.
कर आणि आयात शुल्क : आयात कर, जीएसटी आणि स्थानिक शुल्क देखील किमतींवर परिणाम करतात.
जागतिक अनिश्चितता : युद्ध, आर्थिक मंदी, व्याजदरातील बदल यांचा थेट परिणाम. अनिश्चिततेत गुंतवणूकदार सुरक्षित पर्याय म्हणजे सोने पसंती करतात.
सांस्कृतिक महत्त्व : भारतात सोने परंपरांशी जोडलेले आहे; सण, लग्नकार्य यांमुळे मागणी वाढते.