मुंबई: बृहन्मुंबई महानगरपालिकेच्या केईएम (KEM), नायर आणि कूपर या प्रमुख रुग्णालयांमधील जैववैद्यकीय कचऱ्याची विल्हेवाट लावण्याबाबत आज विधान परिषदेत आमदार मिलिंद नार्वेकर यांनी उपस्थित केलेल्या तारांकित प्रश्नाला उत्तर देताना मंत्री पंकजा मुंडे यांनी प्रशासकीय वस्तुस्थिती स्पष्ट करत सरकार या विषयावर गंभीर असल्याचे सांगितले.
विधान परिषदेच्या कामकाजादरम्यान आमदार मिलिंद नार्वेकर यांनी मुंबईतील पालिकेच्या रुग्णालयांमध्ये निर्माण होणाऱ्या जैववैद्यकीय कचऱ्याचा मुद्दा उचलून धरला. रुग्णालयांमध्ये मोठ्या प्रमाणावर कचरा साचत असून त्याची शास्त्रोक्त पद्धतीने विल्हेवाट लावली जात नसल्याने रुग्ण आणि सामान्य नागरिकांच्या आरोग्याला धोका निर्माण होत असल्याकडे नार्वेकर यांनी लक्ष वेधले. विशेषतः केईएम, नायर आणि कूपर यांसारख्या मोठ्या रुग्णालयांमधील विदारक परिस्थिती त्यांनी सभागृहात मांडली.
या प्रश्नाला उत्तर देताना मंत्री पंकजा मुंडे यांनी वस्तुस्थिती मांडली. त्यांनी स्पष्ट केले की, रुग्णालयातील कचरा व्यवस्थापनासाठी निविदा प्रक्रिया आणि संबंधित कंत्राटदारांच्या कामावर सरकारचे बारीक लक्ष आहे. "कचऱ्याची विल्हेवाट लावण्याची प्रक्रिया अधिक गतिमान करण्यासाठी आधुनिक तंत्रज्ञानाचा वापर करण्यावर भर दिला जात आहे. ज्या ठिकाणी त्रुटी आढळतील, तिथे कठोर कारवाई केली जाईल," असे आश्वासन पंकजा मुंडे यांनी दिले. तसेच, पालिका प्रशासनाला या संदर्भात कडक निर्देश देण्यात आल्याचेही त्यांनी नमूद केले.
