संगमनेर : संगमनेर तालुक्यातील रणखांब परिसरात एकतर्फी प्रेमातून तरुणीवर हल्ला झाल्याची घटना ताजी असतानाच, वडगाव पान परिसरात एका अल्पवयीन मुलीवर ॲसिड फेकल्याचा धक्कादायक प्रकार घडला आहे. संबंधित विद्यार्थिनी ही वडगाव पान येथील एका विद्यालयात शिक्षण घेत आहे.
दुपारी शाळा सुटल्यानंतर हाडके मळा येथून सायकलवरून घरी जात असताना एका अज्ञात तरुणाने तिच्यावर ॲसिड फेकले. या हल्ल्यात मुलगी गंभीर जखमी झाली असून स्थानिक नागरिकांनी तिला तात्काळ जवळच्या खासगी रुग्णालयात दाखल केले. डॉक्टरांनी प्राथमिक उपचार केल्यानंतर पुढील उपचारासाठी तिला लोणी येथील प्रवरा रुग्णालयात नेण्याचा सल्ला दिला. सध्या प्रवरा रुग्णालयात तिच्यावर उपचार सुरू आहेत.
अल्पवयीन मुलीवरील ॲसिड हल्ल्याच्या घटनेचा पुढील तपास संगमनेर तालुका पोलीस करत असून हल्लेखोराचा शोध सुरू आहे. या घटनेमुळे वडगाव पान परिसरात भीती आणि संतापाचे वातावरण पसरले आहे. संशयित आरोपीवर कठोर कारवाई करण्यात यावी, अशी मागणी स्थानिक नागरिकांकडून करण्यात येत आहे.
