मॉस्को/तेहरान : इराण आणि अमेरिका-इस्रायल यांच्यात सुरू असलेल्या संघर्षाच्या पार्श्वभूमीवर आणखी एक मोठी घडामोड समोर आली आहे. इराणचे नवे सर्वोच्च नेते मोजतबा खामेनी यांना गुप्तपणे रशियात हलवण्यात आल्याचा दावा कुवेतमधील एका वृत्तपत्राने केला आहे. या वृत्तामुळे आंतरराष्ट्रीय राजकारणात नव्या चर्चांना सुरुवात झाली आहे.
संघर्ष सुरू झाल्यानंतर इराणचे माजी सर्वोच्च नेते अय्यातुला खामेनी यांच्या मृत्यूनंतर देशात मोठी राजकीय हालचाल झाली होती. त्यानंतर मोजतबा खामेनी यांची सर्वोच्च नेतेपदी निवड करण्यात आली. मात्र या काळात त्यांच्याही सुरक्षेबाबत गंभीर चिंता व्यक्त केली जात होती.
कुवेतच्या अल जरीदा या वृत्तपत्राने दिलेल्या माहितीनुसार, मोजतबा खामेनी यांना अत्यंत गुप्त पद्धतीने रशियन लष्करी विमानातून मॉस्कोला नेण्यात आले. इराणमधील वाढत्या हल्ल्यांमुळे आणि सुरक्षेच्या कारणास्तव हा निर्णय घेण्यात आल्याचे सांगितले जात आहे. त्यांना मॉस्कोतील क्रेमलिन परिसरातील विशेष वैद्यकीय सुविधेत दाखल करण्यात आल्याचा दावा देखील या वृत्तात करण्यात आला आहे.
दरम्यान, अमेरिकेचे राष्ट्राध्यक्ष डोनाल्ड ट्रम्प यांनी एका मुलाखतीत मोजतबा खामनेई यांच्या स्थितीबाबत अनिश्चितता व्यक्त केली. ते जिवंत आहेत की नाही, याबाबत स्पष्ट माहिती उपलब्ध नसल्याचे त्यांनी सांगितले. त्यांच्या या वक्तव्यामुळे या प्रकरणाभोवती आणखी चर्चा सुरू झाली आहे.
इराणच्या सूत्रांनी मात्र मोजतबा खामेनी सुरक्षित असल्याचे म्हटले आहे. तरीही त्यांना रशियात हलवण्यात आल्याच्या वृत्तामुळे आंतरराष्ट्रीय स्तरावर अनेक प्रश्न उपस्थित होत आहेत. जर हे वृत्त खरे ठरले, तर रशियाची भूमिका या संघर्षात अधिक महत्त्वाची ठरू शकते आणि इराण-अमेरिका-इस्रायल तणाव आणखी वाढण्याची शक्यता व्यक्त केली जात आहे.
