संयुक्त अरब अमिरातीतील दुबई येथे ड्रोन हल्ला झाल्याची माहिती समोर आली आहे. दुबई प्रशासनाने गुरुवारी या हल्ल्याची अधिकृत माहिती दिली. एका वार्ताहराने शहरातील डाउनटाउन भागात स्फोटांचे आवाज ऐकल्याचे सांगितले आहे. इराण आणि अमेरिका-इस्रायल यांच्यात सुरू असलेल्या हल्ल्यांच्या पार्श्वभूमीवर आखाती देशही या संघर्षात अडकत असून यूएईसह इतर आखाती देशांवरही हल्ले होत आहेत.
दुबई सरकारच्या मीडिया कार्यालयाने सोशल मीडिया प्लॅटफॉर्म ‘एक्स’वर पोस्ट शेअर करत म्हटले आहे की, “अल वदा’अ परिसरात घडलेल्या ड्रोन घटनेवर दुबईचे अधिकारी तातडीने कारवाई करत आहेत.” पुढे पोस्टमध्ये नमूद करण्यात आले आहे की, “या घटनेत कोणतीही जीवितहानी किंवा जखमी झाल्याची माहिती नाही. एका वार्ताहराने 'अल वदा’अ या निवासी भागाच्या वर धूर उठताना पाहिल्याचेही सांगितले.
अमेरिका आणि इस्रायल यांनी २८ फेब्रुवारी रोजी इराणवर केलेल्या हल्ल्यानंतर मध्यपूर्वेत युद्धाची परिस्थिती निर्माण झाली आहे. या संघर्षामुळे आखाती प्रदेशातील देशांना इराणच्या हल्ल्यांचा सर्वाधिक फटका बसला आहे. आखाती देशांवरील हल्ल्यांमध्ये आतापर्यंत २४ जणांचा मृत्यू झाला असून त्यामध्ये अमेरिकेचे सात सैनिक आणि ११ सामान्य नागरिकांचा समावेश आहे.
ब्रिटिश सैन्याच्या ‘युनायटेड किंगडम मेरीटाइम ट्रेड ऑपरेशन्स सेंटर’च्या माहितीनुसार, दुबईतील हल्ल्यापूर्वी गुरुवारीच फारसी आखातात दुबईच्या किनाऱ्याजवळ एका कंटेनर जहाजावर अज्ञात वस्तूने हल्ला करण्यात आला होता, ज्यामुळे जहाजाला आग लागली. मात्र जहाजावरील सर्व कर्मचारी सुरक्षित असल्याचे केंद्राने स्पष्ट केले आहे.
