जम्मू : नॅशनल कॉन्फरन्सचे अध्यक्ष आणि जम्मू-काश्मीरचे माजी मुख्यमंत्री फारुख अब्दुल्ला यांच्यावर बुधवारी रात्री एका व्यक्तीने गोळीबार करण्याचा प्रयत्न केला. पण सुरक्षारक्षकांच्या सतर्कतेमुळे हल्लेखोर लगेच पकडला गेला. फारुख अब्दुल्ला सुरक्षित आहे. त्यांना काहीही इजा झाली नाही.
जम्मूत एका लग्न सोहळ्याला फारुख अब्दुल्ला उपस्थित होते. त्यांच्यासोबत राज्याचे उपमुख्यमंत्री सुरिंदर चौधरी देखील होते. नेमका त्याचवेळी हल्ला झाला. या हल्ल्यात सुरिंदर चौधरी किरकोळ जखमी झाले. घटनेचे सीसीटीव्ही फूटेज समोर आले आहे.
समोर आलेल्या सीसीटीव्ही फूटेजमध्ये हल्लेखोर कमल सिंग जामवाल मागून येत फारुख अब्दुल्ला यांच्या डोक्यावर बंदूक रोखताना दिसत आहे. सुरक्षा कर्मचाऱ्यांनी ताबडतोब हल्लेखोराला पकडले. त्यावेळी हल्लेखोराने स्वतःची सुटका करून घेण्याचा प्रयत्न करण्यासाठी तसेच दहशत पसरवण्यासाठी हवेत गोळीबार करण्याचा प्रयत्न केला. पण सुरक्षा रक्षकांनी त्याची डाळ शिजू दिली नाही. फारुख अब्दुल्ला यांना सुरक्षित ठिकाणी नेण्यात आले. हल्लेखोराला अटक करण्यात आली. या प्रकरणी तपास सुरू आहे. राज्याचे मुख्यमंत्री आणि फारुख अब्दुल्लांचे पुत्र ओमर अब्दुल्ला यांनी हल्ल्याचा प्रयत्न झाल्याच्या वृत्ताला दुजोरा दिला आहे.
View this post on Instagram
