मुंबई: टी२० विश्वचषक २०२६ मधील ऐतिहासिक विजयानंतर भारतीय संघावर बीसीसीआयकडून बक्षिसांचा वर्षाव करण्यात आला आहे. न्यूझीलंडचा पराभव करून सलग दुसऱ्यांदा विश्वविजेतेपद पटकावणाऱ्या सूर्यकुमार यादवच्या नेतृत्वातील टीम इंडियासाठी १३१ कोटी रुपयांचे बक्षीस जाहीर करण्यात आले आहे. मात्र, हा सर्व पैसा खेळाडूंच्या खिशात जाणार नसून, त्यातील एक मोठा हिस्सा सरकारी तिजोरीत म्हणजेच 'इन्कम टॅक्स'च्या स्वरूपात जमा होणार आहे. चार्टर्ड अकाउंटंट अमित कुमार यांच्या विश्लेषणानुसार, खेळाडूंच्या हातात येणारी प्रत्यक्ष रक्कम बरीच कमी असेल.
कराचे नियम काय सांगतात?
इन्कम टॅक्स ॲक्टच्या कलम 115BB नुसार, कोणत्याही बक्षीस किंवा पुरस्काराच्या रक्कमेला 'इन्कम फ्रॉम अदर सोर्सेस' मानले जाते. या उत्पन्नावर थेट ३० टक्के टॅक्स लागतो. मोठ्या रकमेमुळे यावर १० टक्के ते ३७ टक्के सरचार्ज आणि ४ टक्के आरोग्य व शिक्षण उपकर लागतो. क्रिकेटपटूंच्या उच्च उत्पन्नाचा विचार करता, कराचा एकूण दर सुमारे ३६ टक्के ते ४० टक्क्यांच्या दरम्यान असू शकतो.
बक्षीस रकमेचे अंदाजित गणित
एकूण बक्षिस - १३१ कोटी रुपये टीडीएस (३० टक्के) - ३९.३ कोटी रुपये सरचार्ज (अंदाजित १५ टक्के) - ५.८९५ कोटी रुपये सेस (४ टक्के) - १.८३ कोटी रुपये एकूण टॅक्स कपात- ४७ कोटी रुपये खेळाडूंच्या हाती येणारी रक्कम - अंदाजे ८४ कोटी रुपये
CA अमित कुमार यांच्या मते, ही रक्कम देताना बीसीसीआय 'TDS' (Tax Deduction at Source) कापूनच खेळाडूंना पैसे देईल. खेळाडू त्यांच्या वार्षिक प्राप्तिकर विवरणपत्रात (ITR) काही सवलतींचा दावा करू शकतात, परंतु मोठ्या रकमेवर ३० टक्के टॅक्स अनिवार्य आहे.
BCCI सचिव देवजित सैकिया यांनी संघाचे अभिनंदन करताना म्हटले की, भारतीय संघाने केलेली ही कामगिरी खरोखरच कौतुकास्पद आहे. खेळाडू, सपोर्ट स्टाफ आणि सिलेक्टर्स यांनी घेतलेल्या मेहनतीमुळेच आज आपण हा ऐतिहासिक टप्पा गाठू शकलो आहोत. भविष्यातही टीम इंडिया अशीच चमकदार कामगिरी करत राहील, असा विश्वास त्यांनी व्यक्त केला आहे.
