श्रीलंका क्रिकेटने दक्षिण आफ्रिकेचे माजी क्रिकेटपटू आणि प्रशिक्षक गॅरी कर्स्टन यांना नवीन मुख्य प्रशिक्षक म्हणून नियुक्त केले आहे. कर्स्टन १५ एप्रिल २०२६ पासून पदभार स्वीकारतील आणि त्यांचा दोन वर्षांचा करार १४ एप्रिल २०२८ पर्यंत असणार आहे.
श्रीलंकेच्या संघाला अलिकडच्या काळात मर्यादित षटकांच्या क्रिकेटमध्ये अडचणींचा सामना करावा लागला आहे. कर्स्टन यांच्या नियुक्तीमुळे संघाला एक नवीन दिशा मिळेल. गॅरी कर्स्टन त्यांच्या आंतरराष्ट्रीय अनुभवाचा वापर करून संघाला पुन्हा मजबूत करतील.
गॅरी कर्स्टन यांची कारकीर्द :
गॅरी कर्स्टन यांनी २००७ ते २०११ पर्यंत भारताचे प्रशिक्षकपद भूषवले आणि २०११ च्या विश्वचषकात भारताच्या विजयात मोठी भूमिका बजावली. तो २८ वर्षांत भारताचा घरच्या मैदानावर पहिला विश्वचषक विजय होता. त्या काळात भारताने श्रीलंकेत पहिल्यांदाच द्विपक्षीय मालिका जिंकली आणि न्यूझीलंडविरुद्धही चांगले निकाल मिळवले. नंतर त्यांनी २०११ ते २०१३ पर्यंत दक्षिण आफ्रिकेचे प्रशिक्षकपद भूषवले. २०१३ मध्ये त्यांनी दक्षिण आफ्रिकेच्या संघाला सर्व फॉरमॅटमध्ये पहिल्या क्रमांकावर नेले. अलीकडेच त्यांनी २०२६ च्या टी-२० विश्वचषकासाठी नामिबियासोबत सल्लागार म्हणून काम पाहिले.
कर्स्टन १९९३ ते २००४ पर्यंत दक्षिण आफ्रिकेकडून खेळले. त्यांनी २१ कसोटी शतके आणि १३ एकदिवसीय शतकांसह १४,००० हून अधिक आंतरराष्ट्रीय धावा केल्या. ते एक विश्वासार्ह सलामीवीर होते.
...म्हणून प्रशिक्षकपदी निवड :
श्रीलंका क्रिकेटने स्पष्टपणे सांगितले आहे की, कर्स्टनची प्राथमिक जबाबदारी २०२७ च्या एकदिवसीय विश्वचषकाची तयारी असेल. ही स्पर्धा दक्षिण आफ्रिका, नामिबिया आणि झिम्बाब्वे येथे रंगणार आहे. गॅरी कर्स्टनला विश्वचषक जिंकण्याचा अनुभव आहे आणि ते दक्षिण आफ्रिकेच्या परिस्थितीशी चांगले परिचित आहेत, म्हणून त्यांची प्रशिक्षकपदी निवड करण्यात आली आहे.
