केंद्रीय तपास ब्युरो (सीबीआय) ने अनिल अंबानी आणि त्यांच्या कंपनी रिलायन्स कम्युनिकेशन्स (आरकॉम) च्या इतर संचालकांविरुद्ध फसवणुकीचा नवा गुन्हा दाखल केला आहे. ही कारवाई पंजाब नॅशनल बँक (पीएनबी) च्या तक्रारीवरून करण्यात आली असून २०१३ ते २०१७ या कालावधीत बँकेसोबत सुमारे १,०८५ कोटी रुपयांची फसवणूक झाल्याचा आरोप करण्यात आला आहे. या प्रकरणी भारतीय दंड संहितेच्या कलम ४२० (फसवणूक) आणि १२०बी (गुन्हेगारी कट) अंतर्गत एफआयआर नोंदवण्यात आला आहे.
पीएनबीचे व्यवस्थापक संतोषकृष्ण अन्नवरपु यांनी दिलेल्या तक्रारीनुसार, अनिल अंबानी आणि कंपनीच्या इतर संचालकांनी बँकेकडून घेतलेल्या कर्जाच्या निधीचा कथित गैरवापर केला. एफआयआरमध्ये नमूद केल्याप्रमाणे, या प्रकरणात पीएनबीला सुमारे ६२१.३९ कोटी रुपयांचे नुकसान झाले आहे, तर युनायटेड बँक ऑफ इंडिया (जिचे नंतर पीएनबीमध्ये विलीनीकरण झाले) ला ४६३.८० कोटी रुपयांचा तोटा झाला आहे. बँकेच्या म्हणण्यानुसार, कंपनीने घेतलेले कर्ज अशा ठिकाणी गुंतवले किंवा वळवले ज्याची माहिती बँकेला देण्यात आली नव्हती.
दरम्यान, यापूर्वी फेब्रुवारी महिन्यातही सीबीआयने अनिल अंबानी आणि रिलायन्स कम्युनिकेशन्सविरोधात आणखी एका बँक फसवणूक प्रकरणी गुन्हा दाखल केला होता. त्या प्रकरणात २०१३ ते २०१७ या काळात बँक ऑफ बडोदा सोबत २,२२० कोटी रुपयांपेक्षा जास्त रकमेची फसवणूक झाल्याचा आरोप तपास यंत्रणांनी केला आहे.
याच प्रकरणांच्या पार्श्वभूमीवर प्रवर्तन निदेशालय (ईडी) ने अनिल अंबानी यांच्या अनेक मालमत्तांवर जप्तीची कारवाई केली आहे. मुंबईतील त्यांचा ‘एबोड’ नावाचा आलिशान बंगला जप्त करण्यात आला असून त्याची अंदाजित किंमत सुमारे ३,७१६ कोटी रुपये असल्याचे सांगितले जाते. तसेच दिल्ली, नोएडा, गाझियाबाद, मुंबई, पुणे, ठाणे, हैदराबाद, चेन्नई, कांचीपुरम आणि पूर्व गोदावरी या शहरांमध्ये असलेल्या निवासी घरे, कार्यालयीन जागा आणि जमिनींचाही यात समावेश आहे.
मनी लॉन्ड्रिंग प्रतिबंधक कायद्यांतर्गत करण्यात आलेल्या या कारवाईत आतापर्यंत सुमारे १५ हजार कोटी रुपयांची मालमत्ता जप्त करण्यात आल्याची माहिती समोर आली आहे. रिलायन्स कम्युनिकेशन्सद्वारे झालेल्या कथित बँक फसवणुकीच्या प्रकरणात अनिल अंबानी यांच्यावर एकूण सुमारे ४० हजार कोटी रुपयांच्या आर्थिक गैरव्यवहाराचा तपास सुरू असल्याचे तपास यंत्रणांनी सांगितले आहे.
