मुंबई : मुंबईच्या नायर रुग्णालयाला ईमेलद्वारे धमकी मिळाली आहे. संध्याकाळी चार वाजता बॉम्बस्फोट करून रुग्णालय उडवून देऊ अशी धमकी देण्यात आली आहे. धमकी मिळताच रुग्णालय प्रशासनाने पोलिसांना माहिती दिली आहे. माहिती मिळताच मुंबई पोलिसांचे पथक तसेच बॉम्ब स्क्वाड आणि डॉग स्क्वाड घटनास्थळी पोहोचले. संपूर्ण रुग्णालयात तपासणी करण्यात आली. या तपासणीत बॉम्ब सापडला नाही. अखेर ई मेलद्वारे फक्त त्रास देण्याच्या हेतूने धमकी देण्यात आल्याचे लक्षात आले. पोलिसांनी सायबर तज्ज्ञांच्या मदतीने ई मेल पाठवणाऱ्या व्यक्तीचा शोध सुरू केला. धमकीचा मेल पाठवणाऱ्यावर कायदेशीर कारवाई केली जाईल, असे पोलिसांनी सांगितले.
धमकी देऊन दहशत पसरवणे, अफवा पसरवून दहशत निर्माण करणे, दिशाभूल करणारी माहिती देऊन सार्वजनिक व्यवस्थेवर ताण निर्माण करणे हे गंभीर गुन्हे आहेत. नायर रुग्णालय प्रकरणी सायबर तज्ज्ञांची मदत घेतली जात आहे. धमकी देणाऱ्या व्यक्तीला लवकरच शोधू आणि अटक करू, असा विश्वास पोलिसांनी व्यक्त केला.