मुंबई: मालमत्ताकर थकविणाऱ्या मोठ्या थकबाकीदारांविरोधात महानगरपालिकेने कठोर पावले उचलत जप्ती व लिलाव कारवाई सुरू केली आहे. या मोहिमे अंतर्गत महानगरपालिकेच्या करनिर्धारण व संकलन खात्याने एकूण ३४ मालमत्तांना ई - लिलाव प्रक्रिये अंतर्गत दीर्घ मुदतीची नोटीस जारी केली आहे. या ३४ थकबाकीदार आस्थापनांकडे दंड रकमेसह एकूण ५४८ कोटी ६९ लाख ८२ हजार ४८७ रुपये इतकी मोठी थकबाकी प्रलंबित आहे. यापैकी दीर्घ मुदतीच्या नोटीसीची कालमर्यादा संपलेल्या ११ मालमत्तांची प्रत्यक्ष लिलाव प्रक्रिया करताच यातील ५ मालमत्ताधारकांनी १० कोटी ४५ लाख रूपयांचा थकीत कर भरणा केला. त्यामुळे अतिरिक्त आयुक्त डॉ अश्विनी जोशी यांनी मोठ्या थकबाकीदारांच्या नाक दाबण्याचा केलेला प्रयत्न आता यशस्वी होताना दिसत आहे.
महानगरपालिका आयुक्त भूषण गगराणी, अतिरिक्त आयुक्त (शहर) डॉ. अश्विनी जोशी यांच्या स्पष्ट निर्देशांनुसार तसेच सहआयुक्त (कर निर्धारण व संकलन) विश्वास शंकरवार यांच्या मार्गदर्शनाखाली महानगरपालिका कार्यक्षेत्रातील मालमत्ताधारकांकडून मालमत्ता कराची प्रभावी वसुली करण्यासाठी प्रयत्न सुरू आहेत.
मालमत्ता कर भरणा करण्यास टाळाटाळ करणा-या तसेच आर्थिक क्षमता असूनही मालमत्ताकर न भरणा-या मोठ्या थकबाकीदारांच्या मालमत्तेचा ई लिलाव केला जाणार आहे. त्यात सी विभागात मीनोचर माणिकशाॅ गांधी व व्ही.डी. शहा यांच्या नावे असलेली संमिश्र मालमत्ता (थकबाकी रक्कम २ कोटी २४ लाख ४३ हजार ९२२ रूपये), ,एफ दक्षिण विभागात लमण रघुनाथ शेट्टी यांच्या नावे असलेला भूखंड (थकबाकी रक्कम ८९ लाख १५ हजार ९८८ रूपये), एच पश्चिम विभागात भिकाभाई एन उपाध्याय व श्रीराम जे. भट यांच्या नावे असलेली व्यावसायिक मालमत्ता (थकबाकी रक्कम १८ कोटी ८८ लाख १३ हजार ३७६ रूपये), पी उत्तर विभागात बच्चुभाई डब्ल्यू डी शॉ अॅण्ड कंपनी यांच्या नावे असलेले व्यावसायिक शेड (थकबाकी रक्कम ३ कोटी २३ लाख ३ हजार ९३८ रूपये), पी दक्षिण विभागात मेसर्स अमीर पार्क अॅण्ड अॅम्युझमेंट पार्क यांच्या नावे असलेले हॉटेल (थकबाकी रक्कम ३४ कोटी ५५ लाख ६५ हजार ४९९ रूपये), ई विभागात जयंत ऑईल मिल यांच्या नावे असलेली तेल गिरणी व गोदाम (थकबाकी रक्कम ०१ कोटी ४१ लाख ९१ हजार ०८० रूपये), आर उत्तर विभागात विकयलाल इन्व्हेंस्टमेंट यांच्या नावे असलेला भूखंड (थकबाकी रक्कम ०२ कोटी ४१ लाख ७९ हजार ३२९ रूपये), डी विभागात सरदार सईदना ताहीर सैफुदीन साहेब यांच्या यांच्या नावे असलेले रूग्णालय (थकबाकी रक्कम २१ कोटी ०३ लाख ३६ हजार ७५२ रूपये), डी विभागात सरदार सईदना ताहीर सैफुदीन साहेब यांच्या यांच्या नावे असलेली व्यावसायिक मालमत्ता (थकबाकी रक्कम १३ कोटी ४७ लाख ८६ हजार २४५ रूपये), एच पश्चिम विभागात सुमेर असोसिएट्स यांच्या नावे असलेला मोकळा भूखंड (थकबाकी रक्कम १८८ कोटी ४६ लाख २४७ रूपये), एस विभागात राजहंस असोसिएट्स यांच्या नावे असलेली व्यावासायिक मालमत्ता (थकबाकी रक्कम ४७ कोटी ०२ लाख ९९ हजार ६८७ रूपये), आर दक्षिण विभागात जीवनश्रद्धा कॉ - ऑपरेटीव्ह हाऊसिंग सोसायटी यांच्या नावे असलेला मोकळा भूखंड (थकबाकी रक्कम ६४ लाख २९ हजार ४६१ रूपये) आणि ई विभागात सुमेर बिल्ट कॉर्पोरेशन प्रायव्हेट लिमिटेड यांच्या नावे असलेला मोकळा भूखंड (थकबाकी रक्कम ८५ कोटी ३८ लाख ७८ हजार १८५ रूपये) आदींचा समावेश आहे.
या सर्व थकबाकीदारांना कर भरणा करण्यासाठी २१ दिवसांची दीर्घ नोटीस बजाविण्यात आली आहे. या मुदतीत कर भरणा न केल्यास विहित कार्यपद्धतीनुसार, लिलाव प्रक्रिया सुरू केली जाईल असे अतिरिक्त आयुक्त डॉ अश्विनी जोशी यांनी स्पष्ट केले.
