मुंबई: मुंबई महापालिकेच्यावतीने बेस्टला कायमच मदतीचा हात दिला जात असतानाच आता ही मदत अधिक चांगल्याप्रकारे करण्यासाठी महत्वाचे पाऊल उचलले आहे. यामध्ये बेस्टचे जे चालक सध्या कार्यरत नाहीत, अशा बस चालकांची सेवा महापालिकेने उसणवारी तत्वावर घेण्याचा निर्णय घेतला आहे. यासाठी १०० बेस्टच्या चालकांची उसणवारी तत्वावर सेवा घेण्यासाठी महापालिकेने बेस्टला कळवले असून यासंदर्भात प्रत्येक बस आगारांमधून चालकांकडून अर्ज लिहून घेत त्यांची नियुक्ती केली जाणार आहे. या चालकांची सेवा महापालिकेच्या कचरा वाहनांसह रुग्णवाहिकांसाठी व इतर वाहनांसाठी घेतली जाणार आहे.
मुंबई महापालिकेच्यावतीने बेस्ट प्रशासनाला पत्र लिहून एक वर्षांच्या उसणवारी तत्वावर तत्वावर १०० बस चालकांची सेवा घेण्याची मागणी केली आहे. या १०० बस चालकांची सेवा माहपालिकेच्या कचरा वाहून नेणारी वाहने, बसेस, रुग्णवाहिका, टेम्पाे, डंपर आदींवर तीन पाळ्यांमध्ये घेतली जाणार आहे. यासाठी सेवा घेण्यासाठी बेस्ट उपक्रमाला प्रस्ताव दिला असून याबाबत प्रत्येक आगारांमध्ये आता उपक्रमाच्यावतीने फलक लावून चालकांना सूचना दिल्या असून त्यानुसार अर्ज भरुन घेण्यात येत आहे.
त्यामुळे सेवा ज्येष्ठतेनुसार विद्यमान स्थितीत प्रत्यक्ष बसगाडीवर काम करणाऱ्या ज्या बस चालकांना उर्वरीत सेवा कालावधी १८ महिने अथवा अधिक असेल अशा कर्मचाऱ्यांकडून संमतीपत्र भरुन घेण्यात येत आहे.
महापालिकेच्या मागणीनुसार बेस्ट उपक्रमाच्या विविध आगारांमध्ये फलक लावून बस चालकांना आवाहन करून त्यांच्याकडून संमतीपत्र लिहून घेतली जात आहे.
महापालिकेतील २१ प्रशासकीय कार्यालयांमध्ये कचरा उचलण्यासाठी मनुष्यबळासह वाहनांचा पुरवठा करण्यासाठी कंत्राट कंपनीची निवड केली आहे. तर एम पूर्व, एम पश्चिम आणि एल विभाग या तीन प्रशासकीय विभागांमध्ये महापालिकेच्या वाहनांसह मनुष्यबळासह कचरा उचलून डम्पिंग ग्राऊंडवर विल्हेवाट लावली जाणार आहे. या तिन्ही विभागांमध्ये तीन पाळ्यांमध्ये वाहनांची सेवा देताना खासगी चालकांची सेवा घेण्याऐवजी महापालिका अतिरिक्त आयुक्त डॉ अश्विनी जोशी यांनी बेस्टच्या राखीव तथा अतिरिक्त चालकांची सेवा उसणवारी तत्वावर घेण्याची सूचना केली. त्यानुसार बेस्टच्या १०० चालकांची सेवा उसणवारी तत्वावर घेवून त्यांचा पगार महापालिकेच्या तिजोरीतून दिला जाणार आहे. त्यामुळे या १०० चालकांच्या पगाराचा भार बेस्टच्या तिजोरीव न पडता याची रक्कम बेस्टला वळती केली जाणार आहे.