अमेरिका आणि इस्रायलने इराणवर संयुक्त लष्करी कारवाई केल्यानंतर पश्चिम आशिया प्रदेशातील परिस्थिती झपाट्याने बदलत आहे. या पार्श्वभूमीवर पंतप्रधान नरेंद्र मोदी यांनी मंगळवारी (३ मार्च) दुपारी खाडी प्रदेशातील प्रमुख नेत्यांशी दूरध्वनीवरून चर्चा केली.
पंतप्रधानांनी ओमानचे सुलतान हैथम बिन तारिक तसेच कुवैतचे क्राउन प्रिन्स शेख सबाह अल-खालिद अल-अहमद अल-मुबारक अल-सबाह यांच्याशी स्वतंत्रपणे दूरध्वनीवर संवाद साधला. या चर्चेदरम्यान त्यांनी संबंधित देशांमध्ये सुरू असलेल्या हल्ल्यांबाबत चिंता व्यक्त केली. तसेच त्या देशांमध्ये राहणाऱ्या भारतीय नागरिकांच्या सुरक्षेच्या मुद्द्यावरही चर्चा करण्यात आली.
Spoke with my brother, H.H. Sheikh Tamim bin Hamad Al Thani, the Amir of Qatar. We stand firmly in solidarity with Qatar and strongly condemn any violation of its sovereignty and territorial integrity. We emphasized the urgent need to restore peace and stability in the region…
— Narendra Modi (@narendramodi) March 3, 2026
पंतप्रधान मोदी यांनी कतारचे अमीर शेख तमीम बिन हमाद अल-थानी यांच्याशीही दूरध्वनीवर संवाद साधला. कतारवरील हल्ल्यांचा त्यांनी निषेध केला आणि तेथील भारतीय समुदायाला दिलेल्या सहकार्य व काळजीबद्दल अमीर यांचे आभार मानले. गेल्या ४८ तासांत पंतप्रधान मोदी यांनी संयुक्त अरब अमिरात (यूएई), इस्रायल, सौदी अरेबिया, जॉर्डन, बहरीन, ओमान, कुवैत आणि कतार या देशांच्या नेत्यांशी दूरध्वनीवर चर्चा केली आहे.
यापूर्वी सोमवारी पंतप्रधान मोदी यांनी जॉर्डनचे राजा किंग अब्दुल्ला दुसरे यांच्याशीही दूरध्वनीवर संवाद साधला होता. प्रदेशातील वाढत्या तणावाच्या परिस्थितीवर या चर्चेत सविस्तर चर्चा झाली. चर्चेनंतर पंतप्रधानांनी ‘एक्स’ या सोशल मीडिया प्लॅटफॉर्मवर पोस्ट करत म्हटले की, “मी जॉर्डनचे राजा किंग अब्दुल्ला दुसरे यांच्याशी संवाद साधला. प्रदेशातील झपाट्याने बदलणाऱ्या परिस्थितीबाबत मी गंभीर चिंता व्यक्त केली. शांतता, सुरक्षा आणि जॉर्डनच्या जनतेच्या कल्याणासाठी भारताचा पाठिंबा पुन्हा अधोरेखित केला. या कठीण काळात जॉर्डनमधील भारतीय समुदायाची काळजी घेतल्याबद्दल त्यांचे आभार मानले.”
Had a productive telephone conversation with Crown Prince of Kuwait, H.H. Sheikh Sabah Al-Khaled Al-Hamad Al-Mubarak Al-Sabah. India condemns violation of Kuwait's sovereignty and territorial integrity and stands with its people in this difficult hour. We underscored the…
— Narendra Modi (@narendramodi) March 3, 2026
सोमवारीच (२ मार्च) पंतप्रधान मोदी यांनी बहरीनचे राजा आणि सौदी अरेबियाचे क्राउन प्रिन्स यांच्याशीही दूरध्वनीवर चर्चा केली. माध्यमांच्या वृत्तानुसार, या संभाषणात इराण-इस्रायल संघर्षासह विविध प्रादेशिक मुद्द्यांवर चर्चा करण्यात आली.
