तेहरान : इस्रायलच्या प्रसारमाध्यमांनी दिलेल्या वृत्तानुसार अयातुल्ला अली खामेनींच्या (८६) मृत्यूनंतर त्यांचा मुलगा मोजतबा खामेनी यांची इराणच्या सर्वोच्च नेतेपदी निवड झाली आहे. इराणच्या असेंब्ली ऑफ एक्सपर्ट्सच्या सदस्यांनी मोजतबा खामेनी यांना नेतेपदी नियुक्त करण्याचा ठराव मंजूर केला. इराणच्या रिव्होल्युशनरी गार्ड्सच्या दबावामुळे ही निवड करण्यात आली, असेही वृत्त इस्रायलच्या प्रसारमाध्यमांनी दिले आहे.
अयातुल्ला अली खामेनी यांनी १९८९ पासून २०२६ पर्यंत ३६ वर्ष देशाचे नेतृत्व केले. अमेरिका आणि इस्रायलच्या संयुक्त हवाई हल्ल्यात खामेनींचा मृत्यू झाल्याचे आधी अमेरिकेकडून नंतर इस्रायलकडून जाहीर करण्यात आले. इस्रायलने ४० दिवसांचा राष्ट्रीय दुखवटा जाहीर करत खामेनींच्या वृत्ताला अधिकृत दुजोरा दिला. यानंतर काही दिवसांनी असेंब्ली ऑफ एक्सपर्ट्सच्या सदस्यांनी मोजतबा खामेनी यांना नेतेपदी नियुक्त करण्याचा ठराव मंजूर केला.
इराणच्या असेंब्ली ऑफ एक्सपर्ट्समध्ये धार्मिक नेते बसतात. ही संस्था सर्वोच्च नेत्याच्या कामावर लक्ष ठेवण्याचे काम करते. या संस्थेवर इराणच्या रिव्होल्युशनरी गार्ड्सचा प्रचंड दबाव होता. या दबामुळेच खामेनींच्या मृत्यूनंतर काही दिवसांतच विशेष सभा घेऊन मोजतबा खामेनी यांना नेतेपदी नियुक्त करण्याचा ठराव मंजूर करण्यात आल्याचे वृत्त इस्रायलच्या प्रसारमाध्यमांनी दिले आहे.
मोजतबा खामेनी हे इराणमधले एक प्रभावी नेते आणि अयातुल्ला अली खामेनी यांचे पुत्र आहेत. वडील जिवंत असताना इराणच्या कारभारात मोजतबा यांच्या निर्णयांना आणि मतांना प्रचंड महत्त्व होते. इराण सरकारमध्ये नसताना मोजतबा कारभारावर प्रचंड प्रभाव टाकत होते. आता तर ते अधिकृतरित्या इराणचे नेतृत्व करत आहेत. यामुळे इराणचे भवितव्य आता त्यांच्याच हातात आहे.
अयातुल्ला अली खामेनी यांचा दफनविधी अद्याप झालेला नाही. हा दफनविधी मशहदमधील त्यांच्या मूळ गावी होण्याची शक्यता आहे. पण दफनविधीची तारीख अद्याप जाहीर झालेली नाही. अयातुल्ला अली खामेनी यांच्या वडिलांची कबर मशहदमधील इमाम रझा या तीर्थक्षेत्री आहे. यामुळे अयातुल्ला अली खामेनी यांची कबरही मशहदमधील पवित्र ठिकाणीच असेल, असा अंदाज व्यक्त होत आहे.
