पाच वेळा विजेत्या चेन्नई सुपर किंग्जने म्हणजेच सीएसकेने आयपीएल २०२६ च्या आधी त्यांची नवीन जर्सीचे अनावरण केले आहे. चेन्नईने शनिवारी (२८ फेब्रुवारी) सोशल मीडियावर एका पोस्ट करून खळबळ उडवून दिली होती. ज्यामध्ये रविवारी सकाळी ७:०७ वाजता भारतीय वेळेनुसार मोठी घोषणा करण्यात येणार असल्याचे नमूद केले होते.
त्यानुसार सीएसकेने नंतर एक व्हिडिओ रिलीज करून चाहत्यांना आश्चर्याचा धक्का दिला. या व्हिडिओमधून चेन्नईच्या टीमने आयपीएलच्या नवीन हंगामापूर्वी सीएसके कॅम्पमध्ये धोनीचे आगमन झाल्याची माहिती दिली आणि आयपीएल २०२६ जर्सीची पहिली झलक देखील दाखवली. त्यामुळे चाहत्यांच्या आनंदात वाढ झाली.
कशी आहे चेन्नईची नवीन जर्सी ?
२०२६ च्या जर्सीमध्ये सीएसकेची सिग्नेचर स्टाइल कायम आहे तर सूक्ष्म डिझाइन अपडेट्स देखील आहेत. स्लीव्हजवर पूर्वी दिसणारा कॅमफ्लाज पॅटर्न आता समोरील बाजूस ठळक पट्टे म्हणून पुन्हा वापरण्यात आला आहे, ज्यामुळे किटला एक ताजा आणि विशिष्ट लूक मिळाला आहे. सीएसकेच्या क्रेस्टवर पाच स्टार आहेत, जे फ्रँचायझीच्या पाच इंडियन प्रीमियर लीग विजेतेपदांचे प्रतिनिधित्व करतात (२०१०, २०११, २०१८, २०२१ आणि २०२३).
दरम्यान, सीएसकेची गेल्या हंगामात कामगिरी खराब होती. १४ सामन्यांपैकी सीएसके १० सामन्यात पराभूत झाले आणि आयपीएल २०२५ च्या गुणतालिकेत तळाशी राहिले. २०२६ च्या हंगामापूर्वी, सीएसकेने आगामी हंगामासाठी त्यांच्या संघात काही मोठे बदल केले. त्यापैकी सर्वात लक्षणीय म्हणजे अष्टपैलू रवींद्र जडेजा आणि सॅम करन यांच्याऐवजी यष्टीरक्षक-फलंदाज संजू सॅमसनची निवड करणे हे होते.